Aýa raıy
Astana -23 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Reformalar jónindegi joǵary keńes mekemearalyq uzaq daýlarǵa núkte qoıýy kerek - Toqaev

2020 jyldyń 21 qazan 2020 20:22

NUR-SULTAN. QazAqparat - Reformalar jónindegi joǵary keńes mekemearalyq uzaq daýlarǵa núkte qoıýy kerek. Bul týraly Aqordada ótken Reformalar jónindegi joǵary keńestiń birinshi otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

Memleket basshysy el azamattarynyń tyń tásilder men tıimdi sheshimder kútetinin, mundaı sátte Reformalar jónindegi joǵary keńestiń mańyzdy ról atqaratynyn atap ótti. Keńes ulttyq ekonomıkanyń básekege qabilettiligin nyǵaıtýǵa jáne turǵyndardyń ál-aýqatyn arttyrýǵa baılanysty asa kúrdeli máseleler boıynsha sheshimder qabyldaıtyndyǵyna nazar aýdartty.

Prezıdent óz sózinde Keńes qyzmeti basqa konsýltatıvtik-keńestik organdardan túbegeıli erekshelenýi tıis ekenin, qoǵamdaǵy ózekti máselelerdi nemese túıindi túıtkilderdi jasyrmaı ashyq aıtý qajet ekenin basa aıtty.

«Derekterdi tizip, qalyptasqan jaǵdaıdy sıpattaýmen shektelýge bolmaıdy. Bastysy – ýaqytyly sheshim qabyldaý. Keńes is júzinde júzege aspaıtyn, aldyn ala ázirlengen usynystardy quptap qana otyrmaýy tıis. Keńes mekemearalyq uzaq daýlarǵa núkte qoıýy kerek. Ulttyq ekonomıkany basqarýda, qoǵamdyq damýda, ınstıtýtsıonaldyq reformalar júrgizýde jańa baǵyttar usynýǵa mindetti. Árıne, qazirgi jumystardy da baqylaýy tıis», – dedi Qasym-Jomart Toqaev.

Prezıdent keńestiń kelesi otyrysynda memlekettik josparlaý júıesindegi jańa tásilderdi qarastyrýdy jáne osy másele boıynsha sheshim qabyldaýdy usyndy.

«Biz árbir salada memlekettiń maqsattary men damý kezeńderin aıqyndaıtyn baǵdarlamalyq qujattardyń ıkemdi arhıtektýrasyn qurýymyz kerek. Júıe bıýdjetti josparlaýmen baılanystyrylady jáne memlekettik organdar basshylarynyń júktelgen mindettiń oryndalýyna tikeleı jaýapty ekenin bekitedi. Joǵary keńestiń sheshimderiniń oryndalýyn, ulttyq jobalardyń júzege asyrylýyn, reformalardy jobalyq basqarý qaǵıdattarynyń engizilýin qamtamasyz etý mańyzdy. Qazirgi kezeńde bul – Strategııalyq josparlaý jáne reformalar jónindegi agenttiktiń negizgi mindeti», – dedi Qazaqstan Prezıdenti.

Eske salaıyq, búgin Memleket basshysy Reformalar jónindegi joǵary keńestiń birinshi otyrysyn ótkizdi.


Joǵary qaraı