Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Respýblıkalyq bıýdjetti naqtylaý: Qaı baǵytqa qansha qarjy bólinedi

2021 jyldyń 5 mamyr 2021 11:39

NUR-SULTAN. QazAqparat – QR Qarjy mınıstri Erulan Jamaýbaev Májiliste 2021 jylǵa arnalǵan respýblıkalyq bıýdjetti naqtylaý týraly Zań jobasyn túsindirdi, dep habarlaıdy QazAqparat.

Naqtylaý «Nur Otan» partııasynyń saılaýaldy baǵdarlamasyn, Memleket basshysynyń strategııalyq bastamalary men tapsyrmalaryn qarjylyq qamtamasyz etýge, sondaı-aq COVID-19-ben kúresýge baǵyttalǵan.

«2021 jylǵa arnalǵan respýblıkalyq bıýdjettiń parametrlerine mynadaı ózgerister engizildi. Respýblıkalyq bıýdjet túsimderi 1,1 trln teńgege ulǵaıyp, 12,6 trln teńgeni quraıdy. Bıýdjet tapshylyǵy jalpy ishki ónimge 3,5% deńgeıinde boljanyp otyr, ıaǵnı 149 mlrd teńgege ósken», - dedi mınıstr Májilistiń jalpy otyrysynda.

Onyń aıtýynsha, respýblıkalyq bıýdjet shyǵystarynyń kólemi 1,3 trln teńgege artyp, 15,3 trln teńgeni quraıdy.

«Naqtylaý jobasynda qarajatty mynadaı baǵyttar boıynsha bólý kózdelgen. Birinshi, «Nur Otan» partııasynyń saılaýaldy baǵdarlamasyn iske asyrý – jalpy somasy 884 mlrd teńge. Osy qarajat esebinen jol salý jáne rekonstrýktsııalaý, agroónerkásip keshenin damytý, halyqtyń turǵyn úı jaǵdaıyn jaqsartý, taza aýyz sýmen qamtamasyz etý jáne «Aýyl – El besigi» arnaıy baǵdarlamasy sheńberinde aýyldardy jańǵyrtý boıynsha sharalar qabyldanady.

Ekinshi, koronavırýs ınfektsııasymen kúres boıynsha epıdemııaǵa qarsy is-sharalardy qarjylandyrýǵa 265 mlrd teńge qarastyrylǵan.

Úshinshi, Memleket basshysynyń tapsyrmalaryn jáne buryn qabyldanǵan mindettemelerdi oryndaý. Bıýdjetti naqtylaý nátıjesinde onyń áleýmettik baǵyttylyǵy saqtalǵan, al naqty sektor men óńirlerdi qoldaý kúsheıtildi. Bul týraly bıýdjet shyǵystarynyń qurylymy kórsetip otyr», - dep atap ótti E. Jamaýbaev.

Qarjy mınıstri onyń 723 mlrd teńge somasynda edáýir úlken bóligi ekonomıkanyń naqty sektoryn qoldaýǵa baǵyttalǵanyn aıtty.

«Bul baǵytty yntalandyrý orta merzimde eldiń damýyna mýltıplıkatıvtik áser etetin bolady. Nátıjesinde osy salanyń shyǵystary 2,4 trln teńge nemese jalpy shyǵystar kóleminiń shamamen 16% kóleminde josparlanyp otyr. Bıýdjettiń áleýmettik salasy jalpy alǵanda 374 mlrd teńgege ulǵaıyp, 7,5 trln teńgeni nemese jalpy shyǵystardyń 48,7% quraıdy. Kúsh qurylymy shyǵystary 211 mlrd teńgege ósip, 1,6 trln teńge somasynda josparlanǵan.

Jalpy memlekettik shyǵystar 80 mlrd teńgege qysqartylyp, 3,3 trln teńgeni quraıdy. Bul blok shyǵystarynyń azaıýy Prezıdenttiń bastamalaryna arnalǵan rezervti qaıta bólýmen baılanysty. Qosymsha shyǵystardyń aıtarlyqtaı úlesi nysanaly transferttermen óńirlerge beriletinin atap ótý qajet. Olardyń jalpy somasy 539 mlrd teńge bolsa, onyń ishinde damýǵa arnalǵan transfertter – 335 mlrd teńge», - dep túsindirdi mınıstr E. Jamaýbaev.

Aıta keteıik, Májiliste «2021-2023 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister men tolyqtyrýlar engizý týraly» QR Zań jobasy qaralyp jatyr.


Joǵary qaraı