Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Sabyr Qasymov: Qýǵyn-súrgin kórgen 100 myń qazaq Qyrǵyzstanǵa qashyp barǵan

2021 jyldyń 20 qazan 2021 15:51

ÓSKEMEN. QazAqparat – Saıası qýǵyn-súrgin qurbandaryn tolyq aqtaý jónindegi memlekettik komıssııa múshesi Sabyr Qasymovtyń aıtýynsha, 1916-1930 jyldary zorlyq-zombylyq saıası naýqandary men asharshylyqtyń saldarynan qurban bolǵandar jaıly zertteý jumysyn kúsheıtý qajet, dep habarlaıdy QazAqparat tilshisi.

Bul jaıly ol Shyǵys Qazaqstan oblysynyń ákimdigi men Saıası qýǵyn-súrgin qurbandaryn tolyq aqtaý jónindegi memlekettik komıssııanyń jobalyq keńsesi ótkizgen respýblıkalyq semınarda aıtty.

«Stalındik rejımniń kesirinen halqymyz bastan keshken bul zobalań esh ýaqytta umytylmaıdy. Alaıda osy taqyrypta Qazaqstan táýelsizdik jyldarynda birde bir úkimettik sheshim qabyldaǵan joq. Sol jyldary mıllıondaǵan adam óz jerinen qashýǵa májbúr boldy. Búgin bul máseleni jan-jaqty zertteýdi birinshi ret bastap otyrmyz. Prezıdent Qasym-Jomart Toqaevtyń «Saıası qýǵyn-súrgin qurbandaryn tolyq aqtaý týraly» jarlyǵyna sáıkes, memlekettik komıssııa jan-jaqty zertteý men ońaltý boıynsha usynystar engizý úshin arnaıy top qurdy. Osyndaı toptar aımaqtyq komıssııalarda da quryldy», - dedi Sabyr Qasymov.

Onyń aıtýynsha, saıası qýǵyn-súrginge ushyraǵandar naqty qandaı qıyndyq kórgenin, ashtyqtan, sýyqtan jáne aýrýdan qansha adam kóz jumǵanyn zertteý jumysyn kúsheıtý qajet.

«Sondaı-aq elden ketip, qaıtyp oralǵandarǵa jergilikti bılik pen halyqtyń kózqarasy qandaı bolǵany, qazaq bosqyndaryn olar qalaı qarsy alǵany týraly muqııat zertteý júrgizgen jón. Arhıv qujattarynan belgili bolǵandaı, bosqyndar Novosibirde, Ombyda, Barnaýlda jáne Reseıdiń basqa qalalarynda ashtyqtan ólmeý úshin kez kelgen jumys isteýge májbúr bolǵan. Al Qyrǵyzstanǵa 100 myńǵa jýyq qazaq kóship bardy. Olar burynǵy Frýnze, qazirgi Bishkek qalasynda qıyn jaǵdaıda ómir súrdi», - dedi Saıası qýǵyn-súrgin qurbandaryn tolyq aqtaý jónindegi memlekettik komıssııa múshesi.


Joǵary qaraı