Aýa raıy
Astana -6 °S
Almaty -1 °S
valıýta baǵamy
USD 421.58
EUR 496.83
RUB 5.53
CNY 62.20

Saǵyntaev Almatyda aǵashtardyń zańsyz kesilýin óz baqylaýyna aldy

2020 jyldyń 24 qarasha 2020 16:12

ALMATY. QazAqparat – Almaty ákimi Baqytjan Saǵyntaev Tóle bı kóshesinde 13 aǵashtyń zańsyz kesilýine qatysty oqıǵany óz baqylaýyna aldy, dep habarlaıdy QazAqparat tilshisi.

Ákim bul týraly áleýmettik jelidegi jeke paraqshasynda jazdy.

«Bul óreskel oqıǵa Prezıdent pen qoǵamnyń narazylyǵyn týdyrdy. Qala ákimdigi aǵash kesýge ruqsat bergen joq. Qorshaǵan ortaǵa keltirilgen zalaldyń mólsheri esepteledi.

Mamandandyrylǵan tabıǵatty qorǵaý prokýratýrasy zańsyz aǵash keskeni úshin QR QK 340-baby boıynsha sotqa deıingi tergeý isin bastady. Іs Almaly aýdanyna qarasty polıtsııa basqarmasynyń qaraýyna berildi. Almaty PD bastyǵy Q.Taımerdenovke isti tolyǵymen qarap, onyń obektıvtiligin qamtamasyz etý, kinálilerdi anyqtaý jáne jaýapkershilikke tartý tapsyryldy.

Qazirgi ýaqytta saýda úıiniń janyndaǵy aýmaqty «Arena S» JShS-ǵa qarasty (Sulpak) JK «Sakýra» men «Býrıbekova» merdigerleriniń abattandyrǵany anyqtaldy. «Sakýra» JK-nyń basshysy QR ÁQBtK 437 baby boıynsha túngi ýaqytta azamattardyń tynyshtyǵyn buzǵany úshin ákimshilik jaýapkershilikke tartyldy.

Іstiń barysy týraly jurtshylyqty habardar etip otyramyz. Bul másele meniń jeke baqylaýymda», - dedi Almaty ákimi.

Eske sala ketsek, 23 qarashaǵa qaraǵan túni Almatyda saýda úıiniń janynda (Áýezov-Tóle bı kósheleriniń qıylysy) jaıqalǵan emen men qaraǵash otaldy. Buǵan qatysty turǵyndar áleýmettik jelide narazylyq bildirdi. «Qazir aýdan ákimdigi men Polıtsııa departamenti kesilgen aǵashtardyń tuqymy men sapasyn anyqtaý úshin oqıǵa ornynda jumys istep jatyr. Aıypty tulǵalar anyqtalǵan soń Polıtsııa departamenti olardy jaýapkershilikke tartady. Tolyǵyraq aqparatty anyqtaý jumystary aıaqtalǵan soń jarııalaımyz», - dep málim etken bolatyn qala ákimdiginen.

Keıin Almaty qalalyq Jasyl ekonomıka basqarmasy saýda úıiniń aldyndaǵy aǵashtardyń jappaı kesilýiniń mán-jaıyn anyqtady.

Bul jaǵdaıǵa Prezıdent Qasym-Jomart Toqaev nazar aýdaryp, Almaty ákimi Baqytjan Saǵyntaevqa qyzmettik tekserý júrgizip, kinálilerdi jaýapkershilikke tartýdy tapsyrdy.


Joǵary qaraı