Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Sanıtarlyq talaptarǵa salǵyrt qaraý aýrýdyń ósýine ákep soǵady – Smaıylov

2022 jyldyń 18 qańtar 2022 09:26

NUR-SULTAN. QazAqparat – Sanıtarlyq talaptarǵa neǵurlym salǵyrt qaraýdyń sońy aýrýdyń soǵurlym ósýine ákep soǵatynyn adamdar túsinýi kerek. Bul týraly búgin Úkimet otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Elimizdiń búkil óńirinde koronavırýs ınfektsııasymen naýqastanýdyń kúrt óskeni baıqalyp otyr. Jyl basynan beri indetti juqtyrý deńgeıi 21 esege ósti. Túrkistan oblysy ǵana «sary aımaqta», al qalǵan óńirdiń barlyǵy «qyzyl aımaqta». Táýligine vırýstyń eń kóp taralý jaǵdaıy - elordada, Almaty qalasynda, Qaraǵandy jáne Atyraý oblystarynda tirkelip otyr. Biz mundaı jaǵdaıdyń bolaryn boljadyq, eń bastysy, barlyq óńirde epıdemıologııalyq ahýaldy qatań baqylaýda ustaý qajet», - dedi Úkimet basshysy.

Onyń atap ótýinshe, koronavırýstyń taralýyna jol bermeý jónindegi vedomstvoaralyq komıssııa óńirlerde qosymsha shekteý is-sharalaryn qabyldady.

Olar naqty oryndalýy tıis.

«Betperde kııý, áleýmettik araqashyqtyqty saqtaý sııaqty negizgi aldyn alý sharalaryn buljytpaı saqtaý kerek. Sanıtarlyq talaptarǵa neǵurlym salǵyrt qaraýdyń sońy aýrýdyń soǵyrlym ósýine ákep soǵatynyn adamdar túsinýleri kerek. Sondyqtan monıtorıngtik toptardyń jumys qarqynyn barynsha kúsheıtý qajet. Vırýstyń taralýyn azaıtý úshin naýqastardy der kezinde oqshaýlap, adamdardyń kóp jınalýyna jol berilmeýi tıis», - dedi Premer-Mınıstr.

Osyǵan oraı ol Densaýlyq saqtaý mınıstrligi men ákimdikterge aýrýhanalarda qosymsha oryndar daıyndaýdy tapsyrdy.

«PTR-testileý deńgeıi tómen óńirlerde olardyń sanyn ulǵaıtý qajet. Ásirese, Almaty, Shyǵys Qazaqstan, Jambyl, Qostanaı jáne Túrkistan oblystarynda testileý az jasalady. Elordada, Almaty, Shymkent qalalarynda, Atyraý, Túrkistan, Almaty, Qyzylorda jáne Mańǵystaý oblystarynda revaktsınalaý qarqyny jaqsarǵan joq. Demek, bul máselege ákimder durys qaramaı otyr. Sondyqtan atalǵan óńirler bul jumysty tezdetý kerek», - dedi Álıhan Smaıylov.


Joǵary qaraı