Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Saýyr taýyndaǵy shopandar «Ulttyq at oıyndarynan» sheberlik kýrsynan ótti  - Sheteldegi qazaq tildi BAQ-qa sholý

2021 jyldyń 7 naýryz 2021 10:58

NUR-SULTAN. QazAqparat - «QazAqparat» HAA sheteldegi qazaq tilinde taraıtyn aqparat kózderine aptalyq sholýyn usynady.

Koreıada oqyp jatqan bolashaq avıatsııa ınjeneri Jandolla Mandatulynyń armany - KAZNEWS




KAZNEWS aqparattyq portalyna Mońǵolııada turatyn qandasymyz, bolashaq avıatsııa ınjeneri Jandolla Mandatuly óz armandarynyń qalaı oryndalǵanyn jáne Koreıada grantpen tegin bilim alý joldary týraly aıtyp bergen.

Atalǵan BAQ-tyń jazýynsha, Jandolla Mandatuly Mońǵolııanyń Baıan-Ólgeı aımaǵynyń týmasy. Ol qazirgi kúni Koreıa Respýblıkasynyń Pýsan Ulttyq ýnıversıtetinde avıatsııa ınjeneri mamandyǵy boıynsha bilim alyp jatyr.

«Bolashaq stýdentter mamandyq tańdaý jumysyna óte mán bergen durys dep oılaımyn. Ózińizdiń ne qalap turǵanyńyzdy, jáne qaıda, qandaı ýnıversıtette oqýǵa bolatynyn erterek zertteý qajet. Sondaı-aq, armanyńyzdaǵy ýnıversıtetterdiń qoıatyn talaptaryna búginnen bastap daıyndalý mańyzdy bolmaq. Men bala kezimde ushaqqa otyrýǵa áýes boldym. Úlkeıgende ushqysh bolamyn dep armandaıtynmyn. Sol armandarymdy oryndaý úshin oqýshy kezimnen bastap ushqyshtar mektebine qalaı qabyldanýǵa bolatynyn ustazdardan surap, ınternetten kóptegen aqparattar qaraıtynmyn. Osylaı júrgen kúnderdiń birinde Koreıanyń Pýsan Ulttyq ýnıversıtetinen arnaıy ustazdar Ulanbatyr qalasyna kelip ýnıversıtetke qabyldaý synaǵyn uıymdastyratynyn estip qatty qýandym. Sodan ózime maqsat qoıyp atalmysh ýnıversıtettiń synyna daıyndaldym», - deıdi Jandolla Mandatuly.




Sondaı-aq, Jandolla Pýsan Ulttyq ýnıversıtetiniń bolashaq túlekterine qandaı talaptar qoıyp, oqýǵa qabyldaıtyndyǵyn da aıtyp bergen.

«Pýsan Ulttyq ýnıversıtetine túsýdiń ártúrli sharttary bar. Matematıka, fızıka jáne aǵylshyn tili páninen ulttyq biryńǵaı testileýden 680-nen joǵary upaı jınaý kerek. Halyqaralyq stýdentterge IELTS kerek. Munda 6 ball bolýy shart. Talapkerge matematıkadan synaq tapsyrý, aǵylshyn tilinde esse jazý mindetteledi. Sondaı-aq ýnıversıtettiń suhbattasýy taǵy bar. Men bul synaqtardyń barlyǵyn sátti tapsyrdym. Osylaısha, búgingi kúni armandaǵan mamandyǵym boıynsha stıpendııamen oqyp jatyrmyn. Pýsan qalasy Koreıa Respýblıkasynyń ekinshi megapolısi. Bizdiń oqý ornymyzdyń úlken kampýsy bar. Stýdentterge qajetti nárselerdiń bári daıyn. Ýnıversıtet ǵımaraty men jataqhanasy da zamanaýı talaptarǵa saı, sońǵy úlgidegi qolaıly tehnologııalarmen jabdyqtalǵan. Bul stýdentterge bilim alý úshin úlken shabyt syılaıdy», - deıdi Jandolla Mandatuly.

Rasýl Kýsherbaev «Halyqtyń súıkti depýtaty» mártebesine ıe boldy - «ÓzA» aqparattyq agenttigi




Ózbekstan Respýblıkasy «Olıı Majlıs» Zań shyǵarýshy palatasynyń depýtaty Rasýl Kýsherbaev «Halyqtyń súıikti depýtaty» mártebesine ıe boldy, dep jazady Ózbekstannyń «ÓzA» memlekettik aqparattyq agenttigi.

«Ózbekstannyń «Olıı Majlıs» Zań shyǵarý palatasy depýtattardy rýhanı jáne materıaldyq yntalandyrý jónindegi komıssııanyń usynystaryna sáıkes Memleket basshysynyń bastamasymen zańnamany jetildirýde, saılaýshylarmen jumys jasaýda jáne zań shyǵarý palatasynyń qyzmetin buqaralyq aqparat quraldarynda jarııalaýda belsendilik tanytqan bir top depýtatqa «Halyqtyń súıkti depýtaty» mártebesin bergen. Olardyń qatarynda depýtat Rasýl Kýsherbaev ta bar. Osy mártebege Rasýl Qydyráliulynyń ıe bolýy qoǵamdaǵy ózekti problemalardy kóterýdegi belsendiligi, halyqty uzaq jyldardan beri mezi etken qıyn máselelerdi ońtaıly sheshim tabýyna batyl qadam jasaǵan áreketi sebep bolsa kerek, óıtkeni halyq aýzynda bul azamattyń jumystary óte joǵary baǵalanyp júr», - dep jazady «ÓzA» aqparat agenttigi.

Atalǵan BAQ-tyń dereginshe, Rasýl Kýsherbaev osylaı istegen jumystarynyń árqashan halyq yqylasyna bólengendiginiń arqasynda Ózbekstan Ulttyq aqparattyq agenttigi – ÓzA jyl saıyn uıymdastyryp kele jatqan táýelsiz saýalnama nátıjesinde, 2020 jyl Ózbekstanda «Jyl adamy» atansa, 2019 jylda «Jyl depýtaty» atanǵan eken.

Aıta keteıik, Ózbekstan Respýblıkasy «Olıı Majlıs» Zań shyǵarýshy palatasynyń depýtaty, qandasymyz Rasýl Qydyráliuly Kýsherbaev Tashkent oblysynyń «Qosaǵash» aýylynda týyp-ósken.

Saýyr taýyndaǵy shopandar «Ulttyq at oıyndarynan» sheberlik kýrsynan ótti - «Aǵajaı-Altaı aqparat» saıty




Qytaıdyń Altaı aımaǵynyń Jemeneı aýdanyndaǵy aýyl turǵyndary «Ulttyq at oıyndarynyń» kásiptik-tehnıkalyq bilimderin úırenýge arnalǵan, bir aptalyq sheberlik kýrsynan ótti, dep jazady kazakh.altxw.com saıty.

Atalǵan BAQ-tyń jazýynsha, qazaq halqy meken etken Altaı jerinde alaman at báıgesi, qyzqýar, kókpar, teńge ilý sekildi ulttyq at oıyndary tarıhtan beri jalǵasyp kele jatqan dástúrli ulttyq óner esepteledi. Osy ulttyq óner qazirgi kúni jergilikti jerdiń túrli merekelik is-sharalarynda kópshilikke kórsetilip, ásirese syrttan keletin týrısterdiń qyzyǵa tamashalaıtyn dúnıesine aınalǵan. Sondyqtan jergilikti bıliktiń qoldaýymen osy ulttyq ónerdi kórermenderge tipti de tartymdy, qyzyqty etip kórsetý maqsatynda Jemeneı aýdanynyń Saýyr taýyn meken etken shopandarǵa kásiptik-tehnıkalyq deńgeıin kóterý maqsatynda bir aptalyq at sporty óneriniń sheberlik sabaǵy ótkizilgen.




«Osy sheberlik sabaqqa qatysqan Jemeneı aýdany Tosty aýylynyń turǵyny Erqan Dáýletqanulyna 4 jasynan bastap ákesi taıǵa minýdi úıretken. Jyl saıyn ótip jatatyn aýdan, aýyldaǵy is-sharalardaǵy ulttyq at oıyndaryna ol ónemi qatysyp keledi. Erqan sol jarystardan talaı ret júlde de qanjyǵalaǵan. Ol tilshilerge, qarshadaıynan at qulaǵynda oınap óssede, osy jolǵy sheberlik sabaǵynan kóptegen tehnıkalyq bilimder úırengenin, aldaǵy ýaqytta osy úırengen ádis-tásilderin paıdalanyp týrısterge ulttyq oıyndardy burynǵydan da qyzyqty, dýmandy etip sheber kórsetýge qulshynatyn aıtqan», - dep jazady «Aǵajaı-Altaı aqparat» saıty.

Qazaqstan armııasy túrik áskerı brondy kólikterin synaqtan ótkizdi - TRT




Qazaqstandyq áskerıler túriktiń ARMA-8x8 brondalǵan avtokóligin jáne alystan basqarylatyn NEFER modýlin synaqtan ótkizdi, dep habarlaıdy Túrkııa Radıo Televızııa portaly.

«Qazaqstannyń Qaraǵandy oblysyndaǵy «Spassk» polıgonyndasynaqtar kúndiz jáne túngi ýaqyttarda ótkizildi. NEFER jaýyngerlik modýli (koaksıaldy 7,62 mm pýlemeti bar 30 mm 2A42 avtomatty zeńbiregi) Qazaqstan armııasynda paıdalaný úshin arnaıy jasalǵan. Ol túnde kórý júıesi men jylý beıneleý kamerasyn paıdalanyp túsirýge múmkindik beredi. Budan burynǵy habarlamada ARMA-8x8 brondalǵan kóliginiń NATO standarttaryna ıe ekeni jáne OTOKAR kompanııasy tarapynan áskerı operatsııalarda qoldaný maqsatymen Qazaqstanǵa tegin tapsyrylǵany habarlanǵan bolatyn», - dep jazady TRT.


Avtor Baqytjol Kákesh
Basty sózder: BAQ, Qandastar,
Joǵary qaraı