Aýa raıy
Astana -11 °S
Almaty -2 °S
valıýta baǵamy
USD 421.58
EUR 496.83
RUB 5.53
CNY 62.20

Saılaý komıssııasynyń músheleri qashyqtan oqytylady – OSK

2020 jyldyń 29 qazan 2020 17:41

NUR-SULTAN. QazAqparat – Qazaqstanda saılaý komıssııalarynyń múshelerin qashyqtan oqytý jáne testileý jumystary júrýde. Bul týraly Ortalyq saılaý komıssııasynyń hatshysy Sabıla Mustafına aıtyp berdi, dep habarlaıdy QazAqparat tilshisi.

«Elektoraralyq kezeńde Ortalyq saılaý komıssııasynyń qyzmeti eki baǵytqa toptalady. Bul – úzdiksiz elektoraldyq oqytý arqyly turaqty negizde jumys isteıtin aýmaqtyq saılaý komıssııalary músheleriniń kásibılik deńgeıin arttyrý jáne buǵan qajetti shart retinde ádistemelik keshender men oqytý materıaldaryn ázirleý. Atap ótken jón, «QR saılaý týraly» Konstıtýtsııalyq zań elektoraldyq oqytýdy uıymdastyrýdyń quqyqtyq bazasy bolyp sanalady – 12, 14 jáne 18-bapta saılaý júıesi organdarynyń ókilettikterinde saılaý protsesine qatysýshylardy oqytýdy uıymdastyrý jáne ótkizý kózdelgen. Saılaý komıssııalary múshelerin jergilikti bıýdjet qarajatyna oqytýdy uıymdastyrý úshin quqyqtyq retteý «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańnyń 27 jáne 31-baptarynda jáne Bıýdjet kodeksiniń 54 jáne 55-baptarynda kórsetilgen. Jyl saıyn qabyldanatyn elektoraldyq oqytýdyń «jol kartasyna» sáıkes, saılaýdy uıymdastyrýshylar, ortalyq jáne jergilikti atqarýshy organdardyń memlekettik qyzmetshileri, sot júıesiniń, quqyq qorǵaý organdarynyń qyzmetkerleri jáne elektoraldyq protsestiń basqa da qatysýshylary úshin oqytý sharalary ótkiziledi», - dedi S. Mustafına Ortalyq saılaý komıssııasynda ótken otyrysta.

Onyń aıtýynsha, bıyl elektoraldyq oqytýdyń «jol kartasy» aıasynda Ortalyq saılaý komıssııasy respýblıkalyq jáne óńirlik deńgeılerde saılaý protsesine qatysýshylar arasynan myńnan astam adamdy qamtı otyryp, 24 oqytý sharasyn, dárister, semınarlar jáne trenıngter ótkizgen.

«Jol kartasyn» júzege asyrýda Bilim jáne ǵylym mınıstrligi, Aqparat jáne qoǵamdyq damý mınıstrligi, QR Prezıdenti janyndaǵy Memlekettik basqarý akademııasy, Joǵarǵy Sot janyndaǵy Sot tóreligi akademııasy, Bas prokýratýra janyndaǵy Quqyq qorǵaý organdary akademııasy, Kásibı damý ınstıtýty, QR kásibı tarıhshylary men qoǵamtanýshylar lıgasy, «Jastar» ǵylymı-zertteý ortalyǵy, QR joǵary oqý oryndarynyń qaýymdastyǵy jáne jetekshi ýnıversıtetter men akademııalar OSK áriptesteri bolyp otyr.

Spıker habarlaǵandaı, áriptestik negizde TMD-ǵa qatysýshy memleketterdiń Parlamentaralyq Assambleıasy deńgeıinde halyqaralyq sharalar da júzege asyrylýda.

Atap aıtqanda, Halyqaralyq demokratııany damytýdyń monıtorıngi ınstıtýtymen, RF OSK janyndaǵy reseılik saılaý tehnologııalaryn oqytý ortalyǵymen tabysty jobalar iske asyryldy, sondaı-aq shet memleketterdiń Ortalyq saılaý komıssııalarynyń halyqaralyq konferentsııalaryna qatysqan.


Joǵary qaraı