Semeıde aǵash óńdeý tsehy órtendi
SEMEI. QazAqparat – Semeı qalasyndaǵy aǵash óńdeý tsehynda órt shyqty, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 23 qarashada saǵat 19.10 shamasynda Elemesov kóshesindegi aǵash óńdeý tsehynda órt shyqqan.
«Oqıǵa ornyna dereý jetken órt sóndirýshiler tilsiz jaýdy aýyzdyqtaýǵa kiristi. Shatyrdyń aǵash qurylymdaryn sharpyǵan qyzyl jalynnyń jalpy aýmaǵy 120 sharshy metrge jetken. Sondaı-aq ot jıhazǵa, jeke zattar men esikke jaıylǵan. Órtti óshirý kezinde qutqarýshylar tseh ishinen 27 lıtrlik 2 gaz ballonyn syrtqa alyp shyǵyp úlgerdi», - dep habarlady vedomstvo ókilderi.
30 mınýt ishinde tilsiz jaý tolyqtaı sóndirilgen. Aldyn ala málimet boıynsha, órttiń shyǵýyna otpen abaısyz áreket etý nemese elektr jabdyqtarynyń apattyq rejımi sebep bolýy múmkin.
