Aýa raıy
Astana 0 °S
Almaty 10 °S
valıýta baǵamy
USD 421.58
EUR 496.83
RUB 5.53
CNY 62.20

Semeıde qoǵamdyq kólikterge tekserý júrgiziledi

2020 jyldyń 25 qyrkúıek 2020 03:05

SEMEI. QazAqparat – Semeı qalasynda turǵyndar shaǵymynan keıin qoǵamdyq kólikterge tekserý júrgiziledi, dep habarlaıdy QazAqparat.

Semeı qalalyq aqparat ortalyǵynyń málimetine súıensek, jaqynda Shyǵys Qazaqstan oblysynyń ákimi Danıal Ahmetovtiń Instagram paraqshasynda qoldanýshylar Semeıdegi qoǵamdyq kólikterdiń máselesin sheship berýdi surady.

Turǵyndar avtobýstardyń jaı-kúıine, yńǵaısyz baǵyttarǵa jáne qoǵamdyq kólikterdiń júrý kestesine shaǵymdanǵan.

Semeı qalasynyń jolaýshylar kóligi jáne avtomobıl joldary bólimi máselelerdiń bar ekenin joqqa shyǵarmady. Qazirde qyzmet kórsetý sapasyn jaqsartý boıynsha sharalar qabyldanǵan.

«Iá, shynymen de qoǵamdyq kóliktiń jumysyna qatysty suraqtar bar, olar baqylaýda jáne birtindep sheshilýde. 9 jáne 24 marshrýttardyń qozǵalysy turǵyndar narazylyǵyn týdyrǵan. Olar boıynsha jumys keshendi túrde júrgiziledi. Biz jyljymaly quram sanyn kóbeıtip, reıdter uıymdastyryp, aıyppul salýdy josparlap otyrmyz. Sonymen qatar qarbalas ýaqytta avtobýstardy jetispeıtin baǵyttarǵa qosamyz», - dedi Serikqalı Jumanov.

Talaptardy oryndamaǵan tasymaldaýshylar úshin kelisimshartty buzýǵa deıin qatań sharalar qoldanylady.

«Búgingi kúni jelide 230-ǵa deıin avtobýs jumys isteıdi. Elektrondy bıletteýdiń arqasynda biz naqty ýaqyt rejıminde jolaýshylar aǵynyn kóremiz. Avtobýstardyń sany kún saıyn artyp keledi. Qoǵamdyq kólik kestesine qatysty shaǵymdar boldy. Munda kelisimshartqa sáıkes avtobýstar 21.30-ǵa deıin tasymaldaıdy», - deıdi jolaýshylar kóligi jáne avtomobıl joldary bóliminiń basshysy.

Sondaı-aq qala turǵyndary eski baǵyttardy qaıtaryp, jol aqysynyń ósýine jol bermeýdi suraǵan. Jolaýshylar kóligi jáne avtomobıl joldary bólimindegiler atap ótkendeı, búginde ótinimderdi jáne belgili bir marshrýttardy engizý boıynsha zertteý jumystary jáne tasymaldaýshylarmen tarıfterdi ustap turý boıynsha kelissózder júrgizilýde.

Aıta ketý kerek, Semeı qalasy qoǵamdyq kólikterinde eń tómengi tarıfterdiń biri saqtalyp otyr. Jol júrý quny qazirgi tańda 80 teńgeni quraıdy. Azamattardyń áleýmettik jaǵynan osal sanattarynyń keıbiri aqysyz jáne jeńildikpen júrýde.


Joǵary qaraı