Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Senat «Báıterek» jobasynyń negizgi sharttaryn ózektendiretin zańdy qabyldady

2021 jyldyń 11 qarasha 2021 10:45

NUR-SULTAN. QazAqparat – Parlament Senatynyń jalpy otyrysynda «2004 jylǵy 22 jeltoqsandaǵy QR Úkimeti men RF Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Bul Hattamaǵa 2020 jylǵy 31 qazanda Máskeý qalasynda qol qoıyldy.

«Hattama «Báıterek» Qazaqstan-Reseı birlesken kásiporny» aktsıonerlik qoǵamyn bıýdjettik kredıtten bosatý tártibin jáne «Báıterek» ǵarysh zymyran keshenin júkteý kepildikterin qamtamasyz etedi. Hattamada taraptardyń 2023 jyly orta klasty tasymaldaǵysh zymyranmen «Báıterek» ǵarysh zymyran kesheniniń ushý synaqtarynyń bastalýyn qamtamasyz etý boıynsha mindettemeleri kórsetilgen. Hattamadaǵy basty maqsat - «Báıterek» jobasynyń negizgi sharttaryn túzetý jáne ózektendirý. Bul rette Hattama, eń aldymen, qazaqstandyq taraptyń múddesine saı jasalǵanyn aıta ketý kerek», - dedi QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın.

Onyń aıtýynsha, Qazaqstan taraby úshin bul qajetti Hattama, óıtkeni, birinshiden, birlesken kásiporynnyń QR Qarjy mınıstrliginiń aldyndaǵy bıýdjettik kredıt boıynsha qarjylyq mindettemeleri máselesin zańdy negizde sheshýge múmkindik beredi.

Budan basqa, qujatqa Reseı tarapynyń 2036 jylǵa deıin «Soıýz-5» zymyran-tasyǵyshtaryn ushyrý keshenin qamtamasyz etý jónindegi mindettemeleri engizilgen.

«Báıterek» jobasynyń maqsaty — «Baıqońyr» ǵarysh aılaǵynan ǵarysh apparattaryn ekologııalyq taza zymyran tasyǵyshtarmen shyǵarý. Jobada paıdalanylatyn perspektıvaly «Soıýz-5» zymyran-tasyǵyshy otynnyń ekologııalyq taza komponentinde kerosınmen ushady, sondaı-aq qorshaǵan ortaǵa áserdi aldyn ala baǵalaýdyń oń saraptamasyna ıe. «Báıterek» ǵarysh zymyran keshenin qurýdy úılestiretin jáne ony odan ári paıdalanýǵa jaýap beretin operator – «Báıterek» Qazaqstan-Reseı birlesken kásiporny» AQ. «Báıterek» – bul «Baıqońyr» ǵarysh aılaǵyndaǵy Reseı tarabymen birlesken negizgi joba. Bul jobada Reseı taraby tasymaldaǵysh zymyrandy qurýdy qamtamasyz etedi (916 mln dollar), al Qazaqstan taraby qoldanystaǵy «Zenıt-M» ǵaryshtyq zymyran kesheniniń jerústi keshenin jańǵyrtýdy qarjylandyrýdy memlekettik tapsyrma arqyly oryndaýdy qamtamasyz etedi (90,7 mlrd teńge)», - dedi mınıstr.

Zań jobasy kúshine engende mynadaı nátıjelerge qol jetkizýge múmkindik beredi:

1. «Báıterek» Qazaqstan-Reseı birlesken kásiporny» aktsıonerlik qoǵamy bıýdjettik kredıtti onyń jarǵylyq kapıtalyna aıyrbastaý arqyly kredıttik mindettemelerden bosatylady jáne «Báıterek» memleketaralyq jobasyn iske asyrýdy jalǵastyrýǵa múmkindik alady. Aıyrbastaý rásiminiń nátıjesinde Qazaqstan tarapynyń Birlesken kásiporynǵa qatysý úlesi shamamen 99%-ǵa deıin artady.

2. Hattama «Báıterek» ǵarysh ushyrý kesheninen 10 jyl ishinde Reseı tarapynan keminde jylyna 2 ushyrylym qamtamasyz etýge kepildik beredi. Bul bolashaqta keshenge salynǵan memlekettik ınvestıtsııany qaıta óndirip alýǵa múmkindik beredi.

«Zań jobasyn qabyldaý respýblıkalyq jáne jergilikti bıýdjetterden qosymsha shyǵyndy talap etpeıdi, sondaı-aq onyń teris áleýmettik-ekonomıkalyq saldary da joq. Reseı taraby osy Kelisimniń kúshine enýi boıynsha memleket ishilik rásimderin oryndady», - dedi Baǵdat Mýsın.


Joǵary qaraı