Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Senat Spıkeri Shveıtsarııa Federaldy Jınalysy Ulttyq keńesiniń tóraǵasymen kezdesti

2021 jyldyń 27 tamyz 2021 13:27

NUR-SULTAN. QazAqparat – QR Senatynyń Spıkeri Máýlen Áshimbaev Shveıtsarııa Konfederatsııasy Federaldy Jınalysy Ulttyq keńesiniń tóraǵasy Andreas Ebımen kezdesti, dep habarlaıdy QazAqparat Parlamenttiń joǵarǵy palatasy baspasóz qyzmetine silteme jasaı otyryp..

Qazaqstan Senatynyń Spıkeri Shveıtsarııa delegatsııasynyń bul sapary eki el yntymaqtastyǵyn odan ári nyǵaıtýǵa tyń serpin beretinine senim bildirdi. Sondaı-aq, Shveıtsarııa Qazaqstannyń Eýropadaǵy mańyzdy saıası jáne ekonomıkalyq seriktesi ekenin atap ótti.

«Kelesi jyly bizdiń elderimiz arasyndaǵy dıplomatııalyq qarym-qatynastyń ornaǵanyna 30 jyl tolady. Osy jyldar ishinde ózara tıimdi saıası dıalog jolǵa qoıyldy. Ekijaqty saýda-sattyq tabysty damyp keledi. Birlesken ınvestıtsııalyq jobalarymyz da iske asyrylyp jatyr. Sondyqtan aldaǵy ýaqytta da bizdiń baılanysymyz arta túsedi dep senemin», – dedi Máýlen Áshimbaev.

Kezdesý barysynda saýda-ekonomıkalyq jáne áleýmettik-gýmanıtarlyq ózara is-qımyl máseleleri keńinen talqylandy. Senat Tóraǵasy Qazaqstan men Shveıtsarııanyń qazirgi jahandyq problemalarǵa qatysty ustanymdary uqsas ekenine nazar aýdaryp, qos memleket te ózara is-qımyldy ekijaqty formatta ǵana emes, kópjaqty qurylymdar aıasynda tabysty iske asyryp kele jatqanyn aıtty.




Sonymen qatar Senat Spıkeri parlamentaralyq baılanystardy odan ári damytý men nyǵaıtýdyń jáne Qazaqstan men Shveıtsarııa Parlamentterinde jumys isteıtin yntymaqtastyq toptarynyń qyzmetin jandandyrýdyń mańyzdylyǵyn tilge tıek etti.

«Biz Shveıtsarııanyń parlamentarızm salasyndaǵy tájirıbesine erekshe mán berip otyrmyz. Elimizde kóppartııalyqty jáne pikir alýandyǵyn damytý jolynda naqty isterdi qolǵa aldyq. Bul uzaq merzimdi damýdy kózdeıtin saıası júıeniń turaqtylyǵy úshin mańyzdy», – dedi Senat Spıkeri.

Odan bólek, Máýlen Áshimbaev Qazaqstan Parlamenti Senatynyń qyzmetine, onyń ishinde Memleket basshysynyń saıası júıeni demokratııalandyrýǵa arnalǵan reformalary men bastamalaryn zańnamalyq turǵydan qamtamasyz etý isine toqtalyp ótti. Suhbat kezinde óńiraralyq ózara is-qımyl perspektıvalary men Qazaqstannyń koronavırýstyń taralýyna qarsy qabyldaǵan sharalary da sóz boldy.


Joǵary qaraı