Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Senat tóraǵasy akademık Ómirbek Joldasbekov jaıly esteligimen bólisti

2021 jyldyń 2 naýryz 2021 12:38

NUR-SULTAN. QazAqparat – QR Parlamenti Senatynyń tóraǵasy Máýlen Áshimbaev kórnekti qoǵam jáne memleket qaıratkeri, Ómirbek Joldasbekov jaıly esteligimen bólisti, dep habarlaıdy QazAqparat tilshisi.

«Qazaqta ultqa adal eńbek etýdiń ozyq úlgisin kórsetken tekti azamattar az emes. Solardyń biri de biregeıi kórnekti qoǵam jáne memleket qaıratkeri, ǵalym, akademık, tehnıka ǵylymdarynyń doktory Ómirbek Joldasbekov ekeni daýsyz. Kúni keshe birtýar tulǵanyń týǵanyna 90 jyl toldy. Jalpy, Ómirbek Joldasbekov dese, eń aldymen, eske elimizdegi kóptegen azamat bilim alǵan qara shańyraq qazirgi Qazaq ulttyq ýnıversıteti, burynǵy KazGÝ túsedi. Óıtkeni Ómirbek Aryslanuly 16 jyl boıy osy ýnıversıtetti basqaryp, ony elimizdiń ǵana emes, búkil Keńes Odaǵynyń mańdaıaldy joǵary oqý oryndarynyń birine aınaldyrdy. Jańa mamandyqtar, kafedralar jáne zerthanalardyń dál osy Joldasbekovtiń tusynda kóptep ashylǵany barshaǵa belgili. Al, KazGÝ qalashyǵynyń salynýyna sińirgen eńbegi óz aldyna bólek áńgime», - dep jazdy Senat tóraǵasy Facebook paraqshasynda.

Onyń atap ótýinshe, Ómirbek Aryslanulynyń nebári 39 jasynda eldegi eń basty joǵary oqý ornynyń tizginin ustaýy onyń qanshalyqty bilimdi ári bilikti bolǵanyn ańǵartady. Qaıratker 1986 jyly rektorlyqtan ketkenimen, 1988 jylǵa deıin KazGÝ-de eńbek etti.

«Biz de dál sol jyly osy ýnıversıtetke oqýǵa túsken edik. Ol kezder bilim ordasynda Joldasbekov dáýiriniń jalyny áli basyla qoımaǵan kezeń bolatyn. Sondyqtan áıgili rektordyń dúrildep turǵan shaǵynda oqymasaq ta, onyń sheber uıymdastyrýshy, naǵyz reformator ekenin stýdent kezimizden sanaǵa toqydyq. KazGÝ-diń túlegi retinde Ómirbek Aryslanulynyń jastarǵa jasaǵan jaqsylyqtaryn eshqashan umytpaımyz. Aǵamyzben ómir jolymyz 1994-1995 jyldary táýelsiz Qazaqstannyń Joǵarǵy Keńesinde túıisti. Men ol kezde atalǵan organnyń apparatynda jumys isteımin. Al Ómirbek Joldasbekov Joǵarǵy Keńestiń depýtaty, Ǵylym, bilim jáne jańa tehnologııalar komıtetiniń tóraǵasy edi. Sol jyldary Ómirbek Aryslanulynyń iskerligine, tabandylyǵyna jáne parasattylyǵyna kýá boldyq. Onyń bári bizge ómirlik azyqqa aınalǵan sabaq boldy desem, qatelespeıtin shyǵarmyn», - dep eske alady Máýlen Áshimbaev.

Senat spıkeri keıin elimizde qos palataly Parlament qurylyp, Ómirbek Joldasbekov Májilis depýtaty bolǵanyn, sol arqyly otandyq parlamentarızmniń qalyptasýyna jáne ózi ańsaǵan táýelsizdikti nyǵaıtýǵa úlken úles qosqanyn aıtady.

«Bar bilimi men tájirıbesin, qajyr-qaıraty men qarym-qabiletin egemen eliniń erteńi úshin jumsaǵan aǵamyz ómiriniń sońyna deıin halqyna qaltqysyz qyzmet etti. Sondyqtan qashanda ulttyq múddeni bárinen bıik qoıǵan, batyl bastamalary arqyly elimizdiń ǵylymy men bilimine tyń serpin bergen, Injenerlik akademııanyń jáne Mehanıka-matematıka ınstıtýtynyń negizin qalaǵan, ǵalymdyǵyn búkil dúnıe júzi moıyndaǵan taý tulǵanyń ónegeli ómiri men ǵylymı murasyn dáripteý, ustaz rýhyna taǵzym etý – búgingi býyn men keler urpaqtyń abyroıly mindeti. Aǵamyzdyń jatqan jeri jaryq, topyraǵy torqa bolsyn», - dedi ol.


Avtor Marlan Jıembaı
Basty sózder: Parlament, Senat,
Joǵary qaraı