Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Senat Tóraǵasy TMD PAA jalpy otyrysyna qatysty

2021 jyldyń 26 qarasha 2021 18:50

NUR-SULTAN. QazAqparat - Qazaqstan Parlamenti Senatynyń Tóraǵasy Máýlen Áshimbaev Reseıdiń Sankt-Peterbor qalasynda ótken TMD Parlamentaralyq Assambleıasynyń 53-plenarlyq otyrysyna qatysty. Bul jaıynda Senattyń baspasóz qyzmetinen málim etti, dep habarlaıdy QazAqparat tilshisi.

Óz sózinde Senat Spıkeri TMD Parlamentaralyq Assambleıasy Keńesiniń mereıtoılyq otyrysyn Almaty qalasynda ótkizý máselesi boıynsha Qazaqstanǵa qoldaý bildirgenderi úshin áriptesterine alǵys bildirdi. Atalǵan is-shara kelesi jyldyń naýryz aıynda ótkiziledi dep josparlanyp otyr.

Sondaı-aq Máýlen Áshimbaev Qazaqstan Respýblıkasy kelesi jyly TMD-ǵa tóraǵalyq etetinine nazar aýdardy. Osyǵan oraı elimiz qazirgi tańda bul baǵytta belsendi jumys júrgizýde.

«Memleket basshysy Qasym-Jomart Toqaev Qazaqstannyń TMD-ǵa tóraǵalyq etý tujyrymdamasyn bekitti. Tóraǵalyq kezeńindegi basymdyqtar anyqtaldy. Solardyń biri parlamenttik dıplomatııa baǵyty boıynsha jumys. Qazaqstan óziniń tóraǵalyǵy aıasynda Dostastyq elderiniń aldynda turǵan mindetterdi atqarýda TMD PAA-ǵa odan ári belsendi qoldaý kórsetedi», – dedi Máýlen Áshimbaev.

Plenarlyq otyrysqa qatysýshylar pandemııadan keıingi kezeńdegi damý máselelerin talqylap, epıdemıologııalyq ahýaldy turaqtandyrý boıynsha jumysty jalǵastyrýdyń mańyzdylyǵyna toqtaldy. Osy oraıda Qazaqstan Senatynyń Tóraǵasy bolashaqta bıologııalyq apattar men osyndaı daǵdarystardyń aldyn alý úshin Dostastyq elderi birlesip áreket etýdiń bereri mol ekenin aıtty. Sondaı-aq ol seriktes memleketterdi Qazaqstannyń Bıologııalyq qaýipsizdik jónindegi halyqaralyq agenttik qurý jónindegi bastamasyn qoldaýǵa shaqyrdy.

«Byltyr Qazaqstan Prezıdenti Qasym-Jomart Toqaev BUU janynan Bıologııalyq qaýipsizdik jónindegi halyqaralyq agenttik qurý týraly bastama kóterdi. Bul qurylym qurylǵan jaǵdaıda koronavırýs pandemııasy sııaqty daǵdarystarǵa jol bermeý úshin aldyn-alý sharalaryn qabyldaýdy kózdeıdi. Odan bólek, Agenttik tarapynan adamzatqa tónetin syn-qaterler men qaýipterdiń jańa túrlerine qarsy turýǵa yqpal etýge múmkindik týar edi. Qazirgi tańda barlyq múddeli taraptarmen praktıkalyq konsýltatsııalyq jumys júrgizilýde. Biz TMD elderindegi áriptesterimizdi Qazaqstannyń Bıologııalyq qaýipsizdik jónindegi halyqaralyq agenttik qurýǵa qatysty bastamasyn qoldaýǵa shaqyramyz», – dedi Máýlen Áshimbaev.

Otyrys barysynda parlamentshiler Dostastyq elderiniń ulttyq zańnamalarynda qoldaný úshin PAA ázirlegen modeldik zań jobalaryn qarady.

Sonymen qatar Máýlen Áshimbaev Assambleıa alańynda birqatar ekijaqty kezdesý ótkizdi. Ózbekstan Olıı Majlıs Senatynyń Tóraıymy Tanzıla Narbaevamen kezdesýde eki eldiń parlamentaralyq ózara is-qımylyn odan ári nyǵaıtý máselesi sóz boldy.

Suhbattasý barysynda eki memlekettiń Senattary arasynda qurylǵan Yntymaqtastyq jónindegi komıssııa parlamentaralyq baılanystyń mańyzdy tetigi ekeni atap ótildi. Máýlen Áshimbaev Komıssııanyń kezekti otyrysyn kelesi jyldyń birinshi jartysynda Qazaqstanda, Aral óńirinde ótkizýdi usyndy.

«Komıssııa otyrysynda Aral teńizin qalpyna keltirý baǵytyndaǵy ózara jumysty jáne basqa da máselelerdi talqylaýǵa mol múmkindik bar. Jalpy, sý máselesi bizdiń ekijaqty qatynastarymyzda erekshe oryn alady. Elderimizdiń sý-energetıkalyq áleýetin utymdy paıdalaný jáne transshekaralyq ózenderdiń ekologııasyn qorǵaý máseleleri boıynsha dıalogty odan ári jalǵastyrý mańyzdy. Qazaqstan Prezıdenti atap ótkendeı, «sý dıplomatııasy» aıasyndaǵy kelissózderdiń tezirek aıaqtalýy bizdiń elderimizdiń jáne Ortalyq Azııa memleketteriniń ortaq múddelerine saı keledi», – dedi Máýlen Áshimbaev.

Qazaqstan Senatynyń Spıkeri Reseı Federatsııasy Federaldyq Jınalysy Federatsııa Keńesiniń Tóraıymy Valentına Matvıenkomen kezdesýde de transshekaralyq ózender máselesin qozǵady. Máýlen Áshimbaev bul másele eki eldiń Prezıdentteri qatysqan Qazaqstan men Reseıdiń XVII Óńiraralyq yntymaqtastyq forýmynda jáne Valentına Matvıenkonyń bıylǵy maýsym aıynda Qazaqstanǵa jasaǵan saparynda da kóterilgenin tilge tıek etti.

Osyǵan oraı Máýlen Áshimbaev bul baǵyttaǵy jumysty jandandyrýdy jáne atalǵan máseleni salalyq memlekettik organdardy jumyldyra otyryp parlamenttik deńgeıde talqylaýdy usyndy. Sondaı-aq ol osy jáne basqa da usynystardy Qazaqstan Parlamentiniń Senaty men Reseı Federaldyq Jınalysy Federatsııa Keńesi arasyndaǵy yntymaqtastyq jónindegi komıssııanyń aldaǵy otyrysynyń kún tártibine qosý máselesine nazar aýdardy. Komıssııa otyrysy kelesi jyldyń alǵashqy jartysynda ótkizilmek.

«Sý máselesi bizdiń óńirimiz úshin ózekti túıtkil. Tipti transshekaralyq sý resýrstaryn utymdy jáne uqypty paıdalaný óńirlik damýdyń mańyzdy faktory bolyp sanalady. Odan bólek, pandemııadan keıingi jaǵdaıda turaqty damý máselesi de eki eldiń parlamentshileri úshin mańyzdy ekeni sózsiz. Biz Senat jumysynda aýyldyq aýmaqtardy keshendi damytý, onyń ishinde ınfraqurylymdy, áleýmettik nysandardy, bıznesti órkendetý, jumys oryndaryn qurý máselelerine basa mán beremiz. Osy baǵyttardy zańnamalyq turǵydan qamtamasyz etý boıynsha reseılik áriptesterimizben tájirıbe almasýǵa múddelimiz», – dedi Qazaqstan Parlamenti Senatynyń Tóraǵasy.


Avtor Marlan Jıembaı
Basty sózder: Senat, TMD, Reseı,
Joǵary qaraı