Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Senator birneshe pándi oqytatyn aýyl muǵaliminiń máselesin kóterdi

2021 jyldyń 14 qazan 2021 12:16

NUR-SULTAN. QazAqparat - Senator Aqylbek Kúrishbaev óziniń depýtattyq saýalynda aýyl jastarynyń joǵary bilimge qol jetkizý problemasyn aıtty, dep habarlaıdy QazAqparat tilshisi.

Depýtat aýyldaǵy bilim deńgeıi kóbinese qalalyq deńgeıden artta qalatynyn atap ótti. Aýyldyq jerlerde pedagogtardyń tapshylyǵy 2100-den astam adamdy quraıdy, bul respýblıkanyń pedagog kadrlarǵa degen zárýliktiń 60%-ǵa jýyǵy bolyp otyr. Sonyń nátıjesinde kóptegen aýyl balalary grant alý úshin UBT-da qajetti ball jınaı almaıdy, al olardyń kópshiliginde aqyly oqýǵa múmkindik joq.

Senator agrarlyq mamandyqtarǵa túsý úshin aýyldyq kvotany 30%-dan 50%-ǵa deıin kóterýdi usynyp otyr. Depýtat jyl saıyn joǵary oqý oryndary túlekteriniń tek 30%-y ǵana aýylǵa jumysqa keletini, sonyń saldarynan el bıýdjetinde jyl saıyn 1,5 mlrd teńgege tıimsiz jumsalatyny týraly derekti keltirdi.

«Kóptegen jyldar boıy Parlament depýtattary Bilim jáne ǵylym mınıstrliginiń aldynda aýyl mektepteriniń túlekterine agrarlyq mamandyqtarǵa túsý úshin aýyldyq kvotany 30%-dan kem degende 50%-ǵa deıin arttyrý qajettiligi týraly máseleni kóterip keledi. Biraq másele tabandy túrde sheshilmeı otyr. Agrarlyq ýnıversıtetterdi bitirýshilerdiń, aýyldyq jerlerge jyl saıyn tek 30%-y ǵana jumysqa ornalasady, qalǵandary memlekettik qarajat esebinen oqyp, jumyssyzdar qataryn tolyqtyra otyryp, qalalarda qalady», - dep málimdedi senator Aqylbek Kúrishbaev.

Senator elimizde bilim berý granttaryn bólý tetigine ózgerister engizetin kez keldi dep sanaıdy. Ol memlekettik grant pen stıpendııany test nátıjesi men úlgerimi negizinde ǵana emes, sondaı-aq memlekettiń qoldaýynsyz oqı almaıtyndarǵa áleýmettik kómek kórsetý maqsatynda bólý qajettigin de atap ótti.

«Aýyl mektepterinde bir muǵalim fızıka, ádebıet jáne mýzykany oqytatyn jaǵdaılar bar. Qala men aýyl mektepteriniń materıaldyq-tehnıkalyq bazasy salystyrýǵa kelmeıdi» - dedi depýtat.


Joǵary qaraı