Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Serik Sápıev týraly «Bokser» fılmi kórermenge jol tartady

2021 jyldyń 30 qarasha 2021 10:01

ALMATY. QazAqparat - 1 jeltoqsannan bastap elimizdiń barlyq kınoteatrlarynda boksshy Serik Sápıevtiń shynaıy oqıǵasyna negizdelgen fılmi prokatqa shyǵady, dep habarlaıdy QazAqparat tilshisi.

Rejısser Aqan Sataevtyń jańa fılmi Olımpıada chempıony, boksshy Serik Sápıevtiń ómirbaıany jelisinde túsirildi. Týyndyda Seriktiń bokstaǵy alǵashqy qadamdarynan bastap, mansabyndaǵy basty maqsaty – Olımpıada altynyna qol jetkizý joly baıandalady.

Oqıǵa suhbat formatynda berilgen, onda Serik ómiriniń erekshe kezeńderin eske alyp, sporttaǵy joly qalaı bastalǵany, jeńilisteri, jeńisteri jáne armanynyń oryndalǵany týraly áńgimeleıdi. Sondaı-aq fılmde mahabbat pen dostyq kórinisteri de bar.

Fılmniń stsenarıin jazýǵa Aqan Sataevtyń ózinen bólek eki adam qatysty. Ádebı stsenarıdi jazýǵa Tımýr Jaqsylyqov pen Almıra Tursyn atsalysty. Serik Sápıev keńesshi boldy.

Basty róldi jas akter-debıýtant Smadııar Sabyrov somdady.

«Biz fılmdi uzaq ýaqyt túsirdik - eki jyldan astam ýaqyt jumys istedik. Daıyndyq kezeńi men kastıngke úlken jaýapkershilikpen qaradyq. Biz basty keıipkerimizdi uzaq ýaqyt izdedik. Qudaıǵa shúkir, ony taptyq. Bul sporttyq drama, Olımpıada chempıony týraly oqıǵa, sondyqtan keıipker ekranda senimdi kórinýi úshin tek akter ǵana emes, boksshy da bolýy kerek edi. Smadııarmen, jattyqtyrýshylarmen, keńesshilermen daıyndyq jumystary júrgizildi. Esterińizde bolsa, Serik Sápıev solaqaı, al Smadııar ońaqaı. Ol qaıta jattyǵýǵa májbúr boldy. Meniń oıymsha, bul akter úshin qyzyqty ári úlken tájirbıe. Men búgingi nátıjege óte qýanyshtymyn. Smadııarǵa osy eńbegi úshin, atqarǵan eńbegi úshin taǵy da alǵys aıtqym keledi», – deıdi Aqan Sataev.

Sonymen qatar, ol Serik Sápıevke fılm unaǵanyn tilge tıek etti.

«Bastapqyda biz Seriktiń ózin túsireıik degenbiz, biraq keıin munyń bárin akter oınaýy kerek degen qorytyndyǵa keldik. Onyń ústine, onyń jumys kestesi tyǵyz boldy», - dep túsindirdi rejısser.


Avtor Alma Muqanova
Basty sózder: Mádenıet, Sport,
Joǵary qaraı