Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

ShQO-da gaz ballonyn durys paıdalanbaǵan 45 adam anyqtaldy

2021 jyldyń 25 qarasha 2021 06:19

ÓSKEMEN. QazAqparat – Shyǵys Qazaqstan oblysynda qutqarýshylar gaz ballonyn durys paıdalanbaǵan 45 adamdy anyqtady, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, gaz ballony jarylýy saldarynan bolǵan jazataıym oqıǵalar kóbeıip keledi. Bul ballondy turmysta qoldaný kezinde qaýipsizdik erejesiniń qatań saqtalýy qajettigin kórsetti. Osy rette, óńir qutqarýshylary jeke úı ıelerine tıisti nusqaýlyqtar ótkizdi.

«Kezekti reıd barysynda úıde gaz ballonyn durys qoldanbaǵan 45 adam anyqtaldy. Bul úıler jeke menshik bolǵandyqtan, olarǵa aıyppul salýǵa quqyǵymyz joq. Bizdiń mindetimiz – oqys oqıǵalardyń aldyn alý jáne adamdardy qaýipsizdik sharalaryn buzbaýǵa shaqyrý», - deıdi qutqarýshylar.

Bul oraıda TJD mamandary qaýipsizdik sharalaryn eske saldy. Birinshi kezekte tek jaramdy gaz ballonyn paıdalanyp, ony taza ustaý kerek. Túnde gaz quraldaryn janyp turǵan kúıde qaldyrmańyz. Ballondy ótip bara jatqan kólikten, kezdeısoq qoımalardan satyp alýǵa bolmaıdy.

Gaz ballonyn satyp alý kezinde mindetti túrde gaz saýdalaıtyn mekeme ataýy, ballon nómiri, salmaǵy, jetkizgen avtokóliktiń nómiri kórsetilgen túbirtek nemese talon bolýy qajet. Turǵyn úıdegi gaz ballonynyń saqtalýy men jaramdy jaı-kúıi úshin onyń ıesi jaýapty ekenin qaperden shyǵarmańyz.


Joǵary qaraı