Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

ShQO-da qazaq tili pániniń 760 muǵalimi biliktiligin arttyrady

2022 jyldyń 19 qańtar 2022 13:35

ÓSKEMEN. QazAqparat – Shyǵys Qazaqstan oblysynda qazaq tili pániniń 760 muǵalimi biliktiligin arttyrmaq, dep habarlaıdy QazAqparat tilshisi.

Aımaq basshysy Danıal Ahmetov qala jáne aýdan ákimderiniń, basqarma basshylarynyń qatysýymen jıyn ótkizdi. Sonyń barysynda talqylanǵan máselelerdiń biri – kóptildi bilim berýdi damytýdyń keshendi josparyn júzege asyrý boldy.

«Sońǵy birneshe jylda sheteldik Kembrıdj ýnıversıtetiniń ádistemesi boıynsha oblysta shet tilderin oqytý baǵdarlamasy jaqsy nátıje berdi. Alaıda qazaq tilin oqytý ádistemesin taldaý birqatar olqylyqtardy kórsetti. Orys mektepterinde qazaq tilin oqytý ádistemesin jetildirý maqsatynda S.Amanjolov atyndaǵy Shyǵys Qazaqstan ýnıversıteti arnaıy baǵdarlama ázirlegen. Soǵan sáıkes 760 muǵalim biliktilik arttyrý kýrsynan ótedi», - dedi oblys ákimi.

Onyń aıtýynsha, qosymsha ádistemelik materıal muǵalimderge de, oqýshylarǵa da memlekettik tildi meńgerýge kómektesedi.

– Az ýaqyttyń ishinde elimizdiń kóptegen mektepteri qabyldaıtyn baǵdarlama jasaıtynymyzǵa senimdimin. Eń bastysy, balalarymyz memlekettik tilde sóıleı bastaıdy, – dedi Danıal Ahmetov.


Joǵary qaraı