ShQO-da mal urlyǵymen aınalysqan 2 qylmystyq toptyń joly kesildi
ÓSKEMEN. QazAqparat – Shyǵys Qazaqstan oblysynda mal urlyǵymen aınalysqan 2 qylmystyq toptyń joly kesildi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, óńirde «Mal urlyǵy» jedel aldyn alý sharasy júrgizilýde. Shara barysynda tártip saqshylary 5 urlyq boıynsha qylmystyq is qozǵady. Sonymen qatar buryn jasalǵan taǵy 13 isti ashqan.
«Mal urlaǵany úshin 15 kúdikti ustalyp, 2 uıymdasqan qylmystyq toptyń joly kesildi. Et ónimderin tasymaldaıtyn 304 avtokólik, 172 sharýa qojalyǵy men et satatyn 50-den astam oryn (bazarlar, dúkender, pavılondar) tekserýden ótti», - dedi departament bastyǵy Saǵat Mádıev.
Nátıjesinde veterınarııa salasyna qatysty 13 zańbuzýshylyq anyqtalǵan. Onyń ishinde 9-y mal men et ónimderin tasymaldaýǵa, 4-i satýǵa qatysty bolyp otyr. Jaıylym erejelerin buzǵany úshin 76 mal ıesi QR ÁQBtK-niń 408-babyna sáıkes jaýapqa tartyldy.
