Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

ShQO-da mıllıon sharshy metr turǵyn úı salyndy

2021 jyldyń 28 shilde 2021 10:34

ÓSKEMEN. QazAqparat - Aımaq basshysy áleýmettik-mádenı nysandar men áleýmettik turǵyn úılerdiń qurylysy boıynsha kezekti ret keńes ótkizdi. Іs-shara barysynda Danıal Ahmetov bıyl Shyǵys Qazaqstan oblysynda alǵash ret bir ýaqytta 30-ǵa jýyq jańa áleýmettik-mádenı nysan salynatynyn atap ótti, dep habarlaıdy QazAqparat.

Ákimniń aıtýynsha, bıyl oblysta qurylys qarqyny eń úlken kórsetkishke jetti. Sońǵy 5 jylda alǵash ret bir jylda mıllıon sharshy metr jańa turǵyn úı paıdalanýǵa berildi. Aımaqta jeke qurylys salýshylarmen yntymaqtasa otyryp, «Bir qabatty Shyǵys» baǵdarlamasyn qoldaý arqyly qurylys qarqynynyń osy deńgeıin saqtaý kerek. Sonymen birge, ákimdik «Baqytty otbasy» baǵdarlamasy boıynsha ıpoteka resimdeýge nıet bildirgen kópbalaly otbasylarǵa turǵyn úı sertıfıkatyn berý júıesin engizbek.

ShQO-da áleýmettik-mádenı nysandar kóptep salynýda. Máselen, aýrýhana, mektep, balabaqsha, sport zal, klýb sııaqty taǵy basqa da 27 áleýmettik mádenı-turmystyq nysan bir ýaqytta salynyp jatyr. Ásirese, oblys ortalyǵynan shalǵaıda ornalasqan eldi mekenderge basymdyq berildi.

Borodýlıha, Marqakól, Tavrııa, Úlken Naryn, Samar jáne t.b. kóptegen aýyldar men kentterde bıyldyń ózinde basseınder jáne jańa dene shynyqtyrý-saýyqtyrý ortalyqtary paıdalanýǵa berildi. Al sport modýlderi shalǵaıdaǵy barlyq eldi mekenge salynady.

Qabanbaı aýylynda bıyl tek modýl ǵana emes, polıtsııa bólimi men feldsherlik-akýsherlik pýnkttiń qurylysy da aıaqtalady.




Eń aýqymdy jobalardyń biri – Semeı qalasynan balalarǵa arnalǵan ońaltý ortalyǵyn salý. Budan bólek, Semeı qalasyndaǵy Stepnoı jáne Vostochnyı kentterinde jańa mektepterdiń qurylys jumystary qarqyn alǵan.

«Barlyq nysannyń qurylysy kesteden keshikpeı júrip jatyr. Degenmen, sońǵy ýaqytta merdiger kompanııalar qurylys materıaldary qymbattap ketti degen máseleni jıi kóterip júr. Osyǵan baılanysty oblystyń qurylys jáne ekonomıka basqarmalaryna árbir jaǵdaıdy muqııat qaraýdy, qajet bolsa jobalarǵa túzetý engizýdi tapsyramyn. Qurylys jumystarynyń sapasy osyǵan baılanysty ekenin umytpańyzdar», - dedi aımaq basshysy.








Joǵary qaraı