ShQO-da órtengen úıden 2 adam qutqaryldy
ÓSKEMEN. QazAqparat – Shyǵys Qazaqstan oblysynyń qutqarýshylary bir kún ishinde 6 órtti sóndirip, 2 adamdy qutqaryp qaldy, dep habarlaıdy QazAqparat tilshisi.
ShQO Tótenshe jaǵdaılar baspasóz qyzmetiniń málimetine súıensek, 27 qańtarda saǵat 00:47-de Altaı aýdany Oktıabrskıı kentindegi jer úıde jıhaz órtengen. Oqıǵa ornyna shuǵyl jetken órt sóndirýshiler kók tútin tumshalaǵan úıden 42 jastaǵy er adam men 48 jastaǵy áıeldi alyp shyqty.
Kóp uzamaı jalpy aýdany 4 sharshy metrdi quraǵan qyzyl jalyn tolyqtaı aýyzdyqtaldy. Aldyn ala málimet boıynsha – órttiń shyǵýyna peshti ornatý jáne paıdalaný kezinde qaýipsizdik talaptarynyń saqtalmaýy sebep bolǵan.
«Ulan aýdany Saǵyr aýylynda jeke turǵyn úıdiń shatyry, tereze men esik bloktary jáne jıhaz otqa orandy. Qutqarýshylar úı ishinen 2 gaz ballonyn syrtqa shyǵaryp úlgerdi. Sodan soń 100 sharshy metr alańǵa jaıylǵan tilsiz jaý óshirildi», - delingen aqparatta.
Altaı aýdany Zýbovsk kentinde jer úıde eden, qabyrǵalardyń aǵash konstrýktsııalary janǵan. Órttiń shyǵý sebebi - otty abaısyz qoldanýdan bolýy múmkin. Sondaı-aq 27 qańtarda qutqarýshylar Glýbokoe, Shemonaıha jáne Ulan aýdandarynda jeke turǵyn úılerde shyqqan jalyndy aýyzdyqtady.
