ShQO-da janarmaı beketin tonap ketken 23 jastaǵy jigit ustaldy
ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri tonaýshyny izin sýytpaı qolǵa túsirdi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Óskemen qalasyndaǵy janarmaı beketteriniń birinde jumys isteıtin 47 jastaǵy áıel polıtsııaǵa qońyraý shalǵan. Óz sózinde ol betperde kıgen belgisiz bireý pyshaqpen qorqytyp, kassadan 350 myń teńgeden astam aqshany urlap ketkenin aıtty.
«Jedel-izdestirý sharalary barysynda Krımınaldyq polıtsııa basqarmasynyń polıtseıleri 23 jastaǵy turaqty jumys orny joq jergilikti turǵyndy ustady. Kúdikti óz kinásin moıyndap otyr», - dedi ShQO PD bastyǵy Saǵat Mádıev.
Urlanǵan aqshanyń biraz bóligi aıǵaq retinde tárkilengen. Qazirgi ýaqytta tártip saqshylary Qazaqstan Respýblıkasy Qylmystyq kodeksiniń 191-baby 3-bóliginiń 3-tarmaǵymen sotqa deıingi tergeý amaldaryn júrgizýde.
