Shyǵys Qazaqstanda qar kóshkini júrdi
ÓSKEMEN. QazAqparat – Shyǵys Qazaqstan oblysynda qar kóshkini júrdi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 15 qańtarda saǵat 14.05-te Katonqaraǵaı aýdanyndaǵy «Sogornoe-Barlyq» tasjolynyń 11-shaqyrymynda qar kóshkini júrdi.
«Kún raıynyń kúrt jylynýyna jáne jeldiń ekpini sekýndyna 20 metrge deıin jetýine baılanysty jalpy kólemi 30 tekshe metr kóshkin júrdi. Budan bólek, atalǵan joldyń 14-shi shaqyrymda taǵy da kólemi 150 tekshe metr bolatyn kóshkin túsken. Jol jartylaı jabylyp qaldy», - dep habarlady vedomstvo ókilderi.
Sol jerge jergilikti atqarýshy organ tehnıkasy jumyldyryldy. Kóshkin aýdannyń tynys-tirshiligine áser etken joq, qaza bolǵandar men zardap shekkender bolmady.
