Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Shymkentte dene múmkindigi shekteýli azamattar arasynda respýblıkalyq Spartakıada bastaldy

2021 jyldyń 21 qyrkúıek 2021 21:10

NUR-SULTAN. QazAqparat - Búgin Shymkent qalasynda tirek-qımyl apparaty men kórý qabileti nashar sportshylar arasynda elimizdiń VI Spartakıadasy bastaldy.

25 qyrkúıekke deıin jalǵasatyn jarysqa elimizdiń óńirlerinen 300-den astam sportshy qatysyp jatyr, dep habarlaıdy QazAqparat QR Mádenıet jáne sport mınıstrliginiń baspasóz qyzmetine silteme jasap.

Baǵdarlamaǵa sáıkes qatysýshylar doıby, shahmat, toǵyzqumalaq, parakarate jáne arbada bıleý syndy paralımpıadalyq emes sport túrlerinen synǵa túsedi. Doıby jarysy «64» jáne «100» oıyndary boıynsha 7 týrdan turady. Oǵan elimizdiń 17 óńirinen 80-nen astam sportshy qatysady.

Al elimizdiń 16 óńirinen bas qosqan sportshylar shahmattan baq synaıdy. 7 týrdan turatyn jarysta kórý qabileti nashar jáne tirek-qımyl apparaty zaqymdanǵan sportshylar arasynda bólek ótýde. Sonymen qatar toǵyzqumalaqtan 15 óńirdiń ókilderi sheberlik baıqasady.

Para-karateden jekpe-jekter 22 qyrkúıekte Shymkent qalasyndaǵy joǵary sport sheberligi mektebiniń sport zalynda ótedi. Jarysqa Nur-Sultan, Shymkent qalasynyń jáne Atyraý, Aqtóbe oblysynyń sportshylary qatysady. Іrikteý jáne fınaldaǵy jekpe-jekter barlyq sanat boıynsha bolady.




Sporttyq merekeniń sáni bolǵan arbada otyryp bıleý saıysy 10 nomınatsııa boıynsha uıymdastyryldy.

Olar: kombı erkin, kombı eýropalyq, kombı latına, kombı frıstaıl, dýo, dýo latına, dýo frıstaıl, sıngl jáne sıngl frıstaıl. Bul sport túrinen elimizdiń 13 óńirinen kelgen 50-den astam sportshy jınaldy. Atalǵan bı jarysy «Túrkistan Saraıy» mádenıet úıinde, ústel oıyndary «Kórme» ortalyǵynda ótýde.

Aıta keteıik, Spartakıada jarystary úsh kezeńge bólinip ótkiziledi. Áýeli aýdan, keıin qalalar men oblystarda jáne qorytyndy týr respýblıkalyq deńgeıde. Spartakıada maqsaty – ulttyq qurama komandalaryna daryndy sportshylardy irikteý. Jarys qorytyndysy boıynsha jeńimpazdar men júldegerler Mádenıet jáne sport mınıstrliginiń atynan dıplom, medal jáne arnaıy kýboktarmen marapattalady.








Joǵary qaraı