Aýa raıy
Astana -6 °S
Almaty 2 °S
valıýta baǵamy
USD 421.58
EUR 496.83
RUB 5.53
CNY 62.20

Shymkenttegi áýejaıdyń tenderge túsý zańdylyǵyn tekserý qajet - Májilis depýtaty

2020 jyldyń 7 qazan 2020 13:20

NUR-SULTAN. QazAqparat – Parlament Májilisiniń depýtaty Amanjan Jamalov Shymkenttegi áýejaıdyń tenderge túsý zańdylyǵyn tekserýdi talap etti, dep habarlaıdy QazAqparat tilshisi.

«Jańa ekonomıkalyq baǵyttyń bazalyq qaǵıdattarynyń biri – Memleket basshysy atap ótkendeı ádil básekelestik. Prezıdent aıtqandaı, «kásipkerler ádette naryqqa kire almaıdy, eger ense, olar jeke monopolısterge baǵynýǵa májbúr». Kóbinese básekelestikke qarsy tarap retinde strategııalyq nysandardy jeke qolǵa beretin memlekettik organdardyń ózi kórinip qalyp jatady. Áýejaılardaǵy qyzmet kórsetý naryǵy da bul máseleden aınalyp ótken joq», - deıdi Amanjan Jamalov Úkimet basshysyna joldaǵan saýalynda.

Onyń aıtýynsha, qazirgi ýaqytta Shymkent qalasynyń jolaýshylar kóligi jáne avtomobıl joldary basqarmasy «Shymkent áýejaıy» AQ-ty satyp alý quqyǵymen senimgerlik basqarýǵa berý úshin tender jarııalaǵan. Senimgerlik basqarý merzimi - 10 jyl. Al tenderge ótinimder tek 3 aptanyń ishinde - 2020 jyldyń 18 qyrkúıegi men 8 qazany aralyǵynda qabyldanady.

«Mundaı qaýyrt merzim kóptegen strategııalyq ınvestorlardy básekeden ysyryp tur. Máselen, Air Astana áýe kompanııasy qysqa merzimge qanaǵattanbaıtynyn jarııalady. Bireý úshin bul tenderdi shuǵyl ári tynysh ótkizý tıimdi me dep qalasyń. Tań qalatyn taǵy bir jáıt, konkýrsqa tipti jeke adamdar men jeke kásipkerler de qatysa alady eken. Bir adam tutas áýejaıdy qalaı basqara alady? Bul qala áýejaıynyń bolashaǵyna kúmán keltiredi. Sonymen qatar, sarapshylardyń pikirinshe, mundaı nysan úshin bastapqy baǵa retinde belgilengen 5,2 mlrd teńge - tómendetilgen qun», - deıdi ol.

Osy máselelerdi aıta kele depýtat tenderge ótinimdi qabyldaý merzimin uzartýdy, áleýetti qatysýshylarǵa qoıylatyn talaptardyń qaıta qaralýyn, nysannyń baǵasyn qaıta baǵalaýdy talap etti.


Joǵary qaraı