Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Shynjańda kúıshilerdiń shyǵarmashylyq baıqaýy ótedi - Sheteldegi qazaq tildi BAQ-qa sholý

2021 jyldyń 23 naýryz 2021 13:15

NUR-SULTAN. QazAqparat- «QazAqparat» HAA sheteldegi qazaq tilinde taraıtyn aqparat kózderine aptalyq sholýyn usynady.

Qytaıda «Shynjań qazaq mádenıet qoǵamy» qazirgi zaman kúıshileriniń shyǵarmashylyq baıqaýyn ótkizbek, dep jazady Qytaılyq kazakcnr.com saıty.

Atalǵan BAQ-tyń jazýynsha, dástúrli ónerimizdi ulyqtaǵan baıqaý Shynjań qazaq mádenıet qoǵamynyń WeChat jelisindegi «Jeti boıaý» atty paraqshada onlaıyn formatta ótedi.

«Baıqaý sharttary boıynsha, konkýrsqa 2001 jyldan bergi ýaqytta jaryqqa shyqqan avtorlardyń tól týyndy kúıleri qatystyrylady. Ár qatysýshy tek bir ǵana týyndysyn avtordyń óziniń oryndaýynda nemese basqa adamnyń oryndaýymen jiberýine bolady. Sondaı-aq, kúılerdiń wafe nemese vıdeo nusqasy men 5-syzyqty notasy birge joldanady. Shyǵarmanyń ataýy, shyǵý tarıhy, buryn marapattalǵan jetistigi eskertilý tıis. Sonymen birge, týyndy avtorynyń aty-jónin, qysqasha ómirbaıanyn jazady. Baıqaýǵa ótinishter 2021 jyldyń 10 maýsymyna deıin qabyldanady. Al, baıqaý óz máresine jetkennen soń úzdik týyndylar marappattalyp, atalǵan sharaǵa demeýshi bolyp otyrǵan Beıjińdegi qazaq radıosynyń «Án-dombyra» baǵdarlamasynda saralanǵan týyndylar jarııalanyp, saryny bólek kúılerdiń shyǵý tarıhy áńgimelenip, avtolarmen ótkizilgen syr-suhbaty beriledi. Osylaısha bul týyndylar radıonyń jáne «Shynjań qazaq mádenıeti qoǵamynyń» altyn qorynda saqtalatyn bolady», - dep jazady CNR.

Mońǵolııa Parlamentiniń depýtaty Áýbákir Tileýhanuly úzdik túlekterge stıpendııa beredi - KAZNEWS

Mońǵolııa Parlamentiniń depýtaty Áýbákir Tileýhanuly Mońǵolııanyń UBT(EESh) synaǵynan eń joǵarǵy upaı jınaǵan 6 oqýshyǵa 1 mıllıon tógróg stıpendııa usynady, dep jazady mońǵolııalyq Kaznews aqparattyq portaly.

Atalǵan BAQ-tyń jazýynsha, Mońǵolııa Parlamentiniń múshesi Áýbákir Tileýhanulynyń bastamasymen Baıan-Ólgeı aımaǵynyń jalpy bilim beretin mektepterdiń 12 synyp oqýshylarynyń ulttyq biryńǵaı testileý synaǵyna onlaın daıyndyǵyn jaqsartý úshin ELAB Education Academy ortalyǵynyń kómegine júgingen.

«Bıyl aımaǵymyzda 12 synypty 1680 oqýshy bitiredi. Kovıd-19 pandemııasyna baılanysty UBT -ǵa arnalǵan oqytýlar shekteýli bolyp turǵany belgili. Bul joba arqyly qashyqtyqtan Mońǵolııanyń úzdik 150 -ge jýyq ustazynan tálim alýǵa bolady. Bul oqý úrdisi maýsymnyń 28 kúnine deıin jalǵasady. Osy barysta matematıka, mongol tili, fızıka, hımııa, qoǵamtaný, aǵylshyn tili pánderinen daıyndyq jumysy júrgiziledi. Sondaı aq, Áýbákir Tileýhanuly 12 synypty tabysty aıaqtap, mońǵolııanyń UBT(EESh) synaǵynan joǵarǵy upaı jınap, aımaqta kóshbastaǵan 6 oqýshyǵa 1 mıllıon tógrógten sptıpendııa, úzdik 6 ustazǵa noýtbýk beretinin habarlady. Depýtat aldaǵy ýaqytta bilim salasy, sonyń ishinde Baıan-Ólgeı aımaǵynyń bilim sapasyn jaqsartý, ustazdardyń biliktiligin arttyrý qatarly sharýalarǵa at salysatynyn málimdedi», - dep jazady Kaznews portaly.





Naýryz meıramyna oraı qazaqtildi radıolardyń onlaın basqosýy ótti - Fars

17 naýryzda Qazaq radıosynyń uıymdastyrýymen ótken qazaqtildi radıolardyń onlaın jınalysyna Iran Teleradıo birlestigi álemdik qyzmet torabynyń Kavkaz jáne Orta Azııa departamentiniń basshysy Borhan Heshmatı jáne Pars Today Kazakh saıty ókili qatysty, dep habarlaıdy Irannyń Parstoday aqparat agenttigi.

Atalǵan BAQ-tyń jazýynsha, onalaıyn júzdesý naýryz meıramyna oraı Qazaqstan, Iran, Túrkııa, Mońǵolııa, Qyrǵyzstan, Ózbekstan jáne Reseıdiń Tatarstan avtonomdy respýblıkasyndaǵy qazaqtildi radıolardyń qatysýymen ótken.

Iran Teleradıo birlestigi álemdik qyzmet torabynyń Kavkaz jáne Orta Azııa departamentiniń basshysy Borhan Heshmatı osy basqosýda Qazaqstan halqyn Naýryz meıramymen jáne Qazaq radıosynyń 100 jyldyq mereıtoıymen quttyqtaǵan.

«Qazaq radıosynyń 100 jyldyq mereıtoıynyń Naýryzben tuspa-tus kelýin jaqsy yrymǵa balaımyz. Osy is-sharanyń arqasynda Qazaqstan ulttyq radıosy men Irannyń Qazaq radıosy jáne Pars Today Kazakh saıty arasynda baılanys ornap, syndarly áriptestikke qolaıly jaǵdaı jasalyp, Qazaqstan ulttyq radıosynyń 100 jyldyq mereıtoıynyń biz úshin de, sizderge de este qalarlyq oqıǵaǵa aınalatynyna úmittenemiz», -deıdi Borhan Heshmatı.




Sondaı-aq, Iran Teleradıo birlestigi álemdik qyzmet torabynyń Qazaq radıosynyń dıktory ári aýdarmashysy Gaýhar Omarhanovada osy jınalysta óz pikirimen bólisken.

«Iran Teleradıo birlestigi álemdik qyzmet torabynyń Qazaq radıosy 1995 jyly qurylǵan. Qazaqstanmen qosa, Ózbekstan jáne Qyrǵyzstandy qamtıtyn radıo Iran men álemniń jańalyqtary, saraptama, saıası-ekonomıkalyq, mádenı-áleýmettik jáne dinı-tanymdyq taqyryptardaǵy baǵdarlamalardy kúnde 30 mınýt saǵat 17:20-17:50 aralyǵynda taratady. 30 mınýttyq efır kúnine bir ret qaıtalanyp otyrady. Qazaq radıosynyń kórnekti baǵdarlamalary qatarynda «Nurly jol», «Irannyń tanymal tulǵalary», «Batystyń ómir salty», «Imam Homeını mektebinde», «Irannyń týrıstik tartymdylyqtary», «Parsy tilin úıreneıik» baǵdarlamalary bar. Sondaı-aq aıtýly kúnder men dinı merekelerge oraı daıyndalatyn arnaıy baǵdarlamalar da tyńdarmandardyń erekshe qoldaýyna ıe», - dep jazady Parstoday agenttigi.

Mońǵolııadaǵy QR-nyń Elshisi Naýryz merekesine oraı quttyqtaý joldady - KAZNEWS

Qazaqstan Respýblıkasynyń Mońǵolııadaǵy Tótenshe jáne Ókiletti Elshisi Jalǵas Ádilbaev qazaq halqyn Naýryz merekesimen quttyqtady, dep jazady mońǵolııalyq Kaznews aqparattyq portaly.

«Qurmetti qandastar! Sizderdi Naýryz meıramymen quttyqtaımyn!

Bizdiń halqymyz úshin qasıetti Naýryz meıramy kún men túnniń teńelip, tabıǵattyń qaıta jańǵyratyn erekshe sátinde qazaq halqynyń ulylyǵyn dáripteı túsetin Ulystyń uly kúni!

Bul kúni Áz Naýryz meıramy toılanyp, shyǵys halyqtarynyń Jańa jyly bastalady. Ata-babalarymyz aıtpaqshy, bul – aq túıeniń qarny jarylǵan kún, yrysty, yntymaqty uly toı kúni.

Bizdiń bul merekemiz – qazaq halqynyń tarıhyndaǵy úlken mereke bolyp tabylady. Ultymyzdyń tarıhynda ǵasyrlar boıy toılanyp, jyldan-jylǵa jalǵasyp kele jatqan Naýryz meıramy ár adamnyń jańa bastamasynyń júzege asýyna úmit pen senim uıalatady. Álem tarıhynda kóp memleketter bul kúndi jańa jyl dep sanaıdy. «Ulys oń bolsyn, Aq mol bolsyn!» dep tilek bildiretin dostyq pen yntymaq merekesi kóshbasshylyq mereıimizdi asqaqtata tússin. Naýryz meıramy qutty bolsyn! Aq mol bolsyn!» – dedi QR-nyń Mońǵolııadaǵy Tótenshe jáne Ókiletti Elshisi Jalǵas Ádilbaev.




Atalǵan BAQ-tyń dereginshe, eki el arasynda 1992 jyldyń 22 qańtarynan bastap dıplomatııalyq qarym qatynas ornatylyp, 1997 jyldyń mamyr aıynda Ýlaanbaatarda Qazaqstan Respýblıkasynyń Dıplomatııalyq mıssııasy ashyldy. 2007 jyldyń qańtarynda Dıplomatııalyq mıssııa Elshilik bolyp aýysty. Al, 1992 jyldyń qyrkúıek aıynda Almaty qalasynda Mońǵolııanyń Elshiligi ashylǵan.

Túrik kompanııasy Petropavlda aýrýhana salyp jatyr - TRT

Soltústik Qazaqstannyń Petropavl qalasynda túrik kompanııasy halyqaralyq standarttarǵa saı aýrýhana salyp jatyr, dep habarlaıdy Túrkııa Radıo Televızııa portaly.

«Oblys ákimi Qumar Aqsakalov osy jobanyń aımaq úshin mańyzdy ekenin atap kórsetti. Bazanyń qurylysynyń qıyn sharttarǵa qaramastan jalǵasyp jatqanyn bildirdi. Aıyryqsha jańa aýrýhana túrik áriptestermen birge basqarylady. Oblys dárigerleri bıyldan bastap Túrkııada oqý-daıyndyǵynan ótedi. 90 myń sharshy metrge salynatyn aýrýhana joǵary tehnologııalyq jabdyqtarmen jabdyqtalady. Aýrýhana qurylysy eki jyl boıy 500 adamdy jumyspen qamtıdy. Qurylys 2023 jyly aıaqtalady», - dep jazady TRT.





Tashkentten Almatyǵa kún saıyn reıster júzege asyrylady - «ÓzA» aqparattyq agenttigi

«Uzbekistan Airways» áýe kompanııasy Almatyǵa turaqty reıster sanyn kóbeıtedi. 2021 jyldyń 28 naýryzynan bastap Tashkentten Qazaqstannyń Almaty qalasyna reıster kún saıyn júzege asyrylatyn bolady, dep jazady Ózbekstannyń «ÓzA» memlekettik aqparattyq agenttigi.

«Budan bólek, Ózbekstan áýe naryǵyndaǵy jetekshi kompanııa 24, 28 jáne 31 naýryzda Tashkent-Mınsk-Tashkent qosymsha reısterin jolǵa qoısa, 29 naýryzdan bastap Samarqand-Ystambul baǵytynda turaqty reıster ashylady jáne 30 naýryzda Tashkent-Tbılısı-Tashkent baǵytyndaǵy reıster qalpyna keltiretinin habarlaǵan», - dep jazady «ÓzA» agenttigi.






Avtor Baqytjol Kákesh
Basty sózder: Qoǵam, Qandastar, Qytaı, BAQ,
Joǵary qaraı