Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

«SQ-Farmatsııanyń» burynǵy basshysyna qatysty aqtaý úkiminiń kúshi joıyldy

2021 jyldyń 16 qyrkúıek 2021 17:16

NUR-SULTAN. QazAqparat – Elordanyń apellıatsııalyq soty «SQ-Farmatsııanyń» burynǵy basshysy Berik Sháripke qatysty aqtaý úkiminiń kúshin joıdy, dep habarlaıdy QazAqparat tilshisi.

Aıta keteıik, bıyl 4 tamyzda Nur-Sultan qalasy Esil aýdandyq soty B. Sháripke qatysty aqtaý úkimin shyǵarǵan bolatyn.

«SQ-Farmatsııanyń» burynǵy basshysyna eki bap boıynsha aıyp taǵylǵan bolatyn. Prokýror sottan kúdiktige Qylmystyq kodekstiń 361-babynyń 4-bóligi, 3-tarmaǵy boıynsha laýazymdyq ókilettikterdi teris paıdalaný arqyly aýyr zardaptarǵa jol bergeni úshin jáne osy kodekstiń 287-babynyń 2-bóligi boıynsha uńǵysyz tapanshany zańsyz saqtaǵany úshin 5 jylǵa bas bostandyǵynan aıyrý jazasyn taǵaıyndaýdy surady.

Alaıda ol 287-baptyń 2-bóliginde kózdelgen qylmystyq quqyq buzýshylyq jasaǵany úshin kináli dep tanylyp, 1000 AEK aıyppul taǵaıyndaldy. Al 361-baptyń 4-bóliginiń 3-tarmaǵynda kózdelgen qylmystyq quqyq buzýshylyq jasaýda kinásiz dep tanylyp, onyń is-áreketterinde qylmys quramy bolmaǵany úshin aqtaldy.

Atap aıtqanda, búgin ótken Nur-Sultan qalasy Qylmystyq ister boıynsha appelıatsııalyq alqa otyrysynda atalǵan ınstantsııa sotynyń úkimi joıylyp, jańa aıyptaý úkimi shyǵaryldy. Bul turǵyda SQ-Farmatsııanyń» burynǵy basshysy qorǵanys kostıýmderin jetkizýshi basqa kompanııalardyń kommertsııalyq usynystarynan negizsiz bas tartty degen aıyp taǵyldy.

Qylmystyq isti zerdeleı kele, sot alqasy B. Sháripke qatysty atalǵan eki bap boıynsha kináli dep tanyp, 3 jyl 6 aı bas bostandyǵynan aıyrý jazasy berildi.

Sonymen qatar, B. Shárip ómir boıyna memlekettik qyzmette laýazym alý quqyǵynan aıyryldy.

Eske salsaq, 2020 jyldyń 14 tamyzynda Sybaılas jemqorlyqqa qarsy is-qımyl agenttigi «SQ-Farmatsııa» JShS-nyń burynǵy basqarma tóraǵasy Berik Shárip ustalǵanyn habarlaǵan bolatyn.


Al 2021 jyldyń basynda aıyptaýshy tarap ókili kúdiktiniń kesirinen dárigerler koronavırýs juqtyrdy degen málimet bergen edi.


Joǵary qaraı