Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

SQO-da aldaǵy eki aptada 10 sút fermasy iske qosylmaq

2021 jyldyń 14 jeltoqsan 2021 21:33

PETROPAVL. QazAqparat – Soltústik Qazaqstan oblysy Aıyrtaý aýdanynyń Prekrasnoe eldi mekeninde jańa sút fermasy ashyldy, dep habarlaıdy QazAqparat tilshisi.

Aıyrtaý aýdany Prekrasnoe aýylynda «Ádemi astyq» JShS-gi jańa sút fermasyn iske qosty. Jobanyń somasy 1,6 mlrd teńge. 600 basqa shaqtalǵan kásiporyn zamanaýı jabdyqtalǵan. Mol ónim alý úshin asyl tuqymdy «golshtın» sıyrlary da ákelindi. Qazir munda aýyldyń 30 turǵyny jumys istep jatyr.

Kásipker Baqyt Qusaıynov mal sharýashylyǵymen aınalysý úshin kezinde týǵan aýylyna qaıta kóship kelgen eken. Búginde kásipker eldi mekende 29 turǵyn úı saldy. Aldaǵy ýaqytta medıtsınalyq pýnkt pen demalys ortalyǵynyń qurylysyn bastamaq.

Jańa sút fermasynyń jumysyn óńir basshysy Qumar Aqsaqalov kórdi.

«Óńirde sút fermalarynyń qurylysyn jáne qondyrǵylardy satyp alýdy qarjylandyrý boıynsha pılottyq baǵdarlama bar. Qazaqstanda tek bizde ǵana sút óndirýge qatysty jobalardy júzege asyrýǵa eń qolaıly jaǵdaı jasalǵan.

Dıqandar bıdaı ósirýmen qatar, mal sharýashylyǵymen de aınalysýǵa mindetti. Óıtkeni, sút óndirisi óte tıimdi kásip. Tek osy ferma tolyq qýatqa shyqqanda kún saıyn 1,5-2 mln teńge tabys tappaq», - deıdi Qumar Aqsaqalov.




Fermada veterınarlyq ortalyq bar. Keshen tolyqtaı zamanaýı jabdyqtalǵan.

«Elimiz boıynsha eń kóp ferma salatyn bizdiń oblys. Bıyl Qazaqstanda 29 sút kesheniniń qurylysy júrip jatyr, onyń jartysy Soltústik Qazaqstan oblysynda. 16 sút kesheniniń qurylysy bastaldy, jyl sońyna deıin 10 ferma iske qosylady. Jalpy, elimizde 500 sút fermasy bolsa, onyń 90-y SQO-da ornalasqan. Keler jyly taǵy 10 jańa ferma salyna bastaıdy. Qazir sharýalarmen máseleni pysyqtap jatyrmyz», - deıdi óńir basshysy.

SQO ákiminiń aıtýynsha, sútti óńdeý boıynsha da óńir respýblıkada kósh basynda. Qazaqstanda 1 mln tonna óńdeýge jiberilse, onyń 350 myń tonnasy oblystyń úlesinde.








Joǵary qaraı