Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da belgisiz fırma onshaqty zeınetkerdi aldap, olardyń atyna onlaın nesıe resimdegen

2021 jyldyń 20 qazan 2021 22:52

PETROPAVL. QazAqparat – Soltústik Qazaqstan oblysynda 8 zeınetker alaıaqtarǵa aldanyp qaldy, endi olardyń árqaısysy 3 jyl boıy 1 mln astam teńgeni bankterge qaıtarý tıis, dep habarlaıdy QazAqparat tilshisi.

Alaıaqtardyń arbaýyna túskenderdiń biri – 3 toptaǵy múgedek Kúlbarshyn Ábildınova. Petropavl turǵynyna bireýler telefon arqyly habarlasyp, ózderin almatylyq fırmanyń ókilimiz dep tanystyrǵan. Zeınetkerdi tegin ótetin is-sharaǵa qatysýǵa shaqyryp, ol jerde baǵaly syılyqtardyń, sonyń ishinde eń basty júlde – saýyqtyrý massajyn jasaıtyn kreslonyń utys oıyny ótetinin aıtqan.

«Oıymda túk joq, keldim. Bir kezde uıymdastyrýshylar meni jeńimpaz dep quttyqtaı bastady. Qasyma úıip syılyqtardy qoıdy. Keıin myna qyz syılyqtardy sizdiń atyńyzǵa jazyp beredi dep, dálizge shyǵardy. Qolynda qaǵazdary bar eken. Kózildirigim bolmaǵandyqtan oqı almady. Ol maǵan tegin syılyqtardy alǵanyńyz úshin munda qolyńyzdy qoıyńyz dep, birneshe jerge qol qoıdyryp aldy. Aldanyp qalamyn dep oılaǵan joqpyn, jap-jas balalar», - deıdi Kúlbarshyn Ábildınova.

Zeınetker tek sol kúni keshke ǵana alaıaqtardan zardap shekkenin túsinedi. Qala turǵynynyń atyna 3 jylǵa 600 myń teńge kóleminde onlaın nesıe resimdelgen eken. 70 myń teńge zeınetaqy alatyn áıel endi bankke 1 mln 150 myń teńge qaıtarýy tıis.

«Bizge ázirge 8 zeınetker ǵana shaǵymdandy. Zardap shekkender kóp bolýy múmkin. Bul fırmany jaýapkershilikke tartý ońaı bolmaıdy. Óıtkeni olar – birkúndik, ıaǵnı ataýy ózgerip otyrady. Alaıaqtarda qala turǵyndary boıynsha tolyq málimet bar, oǵan qalaı qol jetkizgeni jáne bankterdiń tómen zeınetaqy alatyndarǵa qalaısha onlaın nesıe resimdeıtini belgisiz. Meniń oıymsha, olardyń banktermen kelisim bar sııaqty», - deıdi SQO tutynýshylar men kásipkerler quqyǵyn qorǵaý qaýymdastyǵynyń tóraǵasy Nadejda Dýbovaıa.


Joǵary qaraı