Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da bıyl 500-den astam júkti áıel koronavırýspen aýyrdy

2021 jyldyń 5 tamyz 2021 18:21

PETROPAVL. QazAqparat – Soltústik Qazaqstan oblysynda jyl basynan 503 júkti áıel koronavırýs juqtyrdy, saldarynan bir shaqalaq shetinedi, dep habarlaıdy QazAqparat tilshisi.

SQO Densaýlyq saqtaý basqarmasy basshysynyń orynbasary Nurlan Aımanovtyń aıtýynsha, jyl basynan aıaǵy aýyr 503 áıelde koronavırýs anyqtalǵan. Olardyń 483-i táýir boldy. Qazir 20-sy dárigerlerdiń baqylaýynda bolsa, 14 áıel statsıonarlyq em alyp jatyr.

«Jansaqtaý bóliminde jatqan úsh áıeldiń ekeýiniń jaǵdaıy óte aýyr. Olar ókpeni jasandy jeldetý apparatyna qosylǵan. Tek shilde aıynda jaǵdaılary aýyr jáne óte aýyr 18 júkti áıeldiń ómiri úshin kúrestik. Analardy aman alyp qalý úshin bosanatyn ýaqyty jetpese de kesir tiligin jasaýǵa týra keldi. Shaqalaqtardyń bári shala týǵan, salmaqtary óte kishkentaı. Ókinishke oraı 770 gramm bolyp kesir tiligimen týǵan balany aman alyp qala almadyq», - deıdi Nurlan Aımanov.

Dárigerdiń aıtýynsha, ásirese aıaǵy aýyr áıelder, qart adamdar men balalarsaqtanyp júrýi qajet.

«Taǵy da aıtamyn, KVI-diń naqty emi joq. Alaıda vaktsına arqyly onyń zardabyn jeńildetýge bolady. Aýyryp túskenderdiń tek 1,5 %-y ǵana vaktsına alǵandar. Olardyń ishinde ottegi ballonyna táýeldiler joq. Ádette syrqattar jansaqtaý bóliminde jatpasa, 14 kúnnen keıin úılerine jiberiledi. Al vaktsına alǵandar altynshy kúni statsıonardan shyǵyp jatyr.

Júkti áıelder, balalarǵa vaktsına qoıylmaıdy, sondyqtan olar qaýip-qater tobynda. Qoǵamdyq oryndarǵa, toı-tomalaqqa barmaı kútingen jón, óıtkeni olarda KVI aýyr ótedi», - deıdi Nurlan Aımanov.


Joǵary qaraı