Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da qandastar men qonys aýdarýshylardy qoldaý ortalyǵy ashyldy

2021 jyldyń 14 qazan 2021 09:50

PETROPAVL. QazAqparat – Soltústik Qazaqstan oblysynda qandastar men eldiń eńbek kúshi artyq aımaqtarynan azamattardy qabyldaý jónindegi aqparattyq keńes ortalyǵy quryldy, dep habarlaıdy QazAqparat tilshisi.

Petropavlda qandastarǵa jáne basqa óńirlerden qonys aýdarýshylarǵa aqparattyq qoldaý kórsetý maqsatynda arnaıy ortalyq ashyldy. Alǵashqy eki aı boıy bul joba pılottyq rejımde jumys isteıtin bolady. Suranys bolyp, qajettilik artqan jaǵdaıda qyzmetin jalǵastyrmaq. Ashylǵanyna birer kún bolǵan ortalyq qazirdiń ózinde 70 shaqty qońyraýdy qabyldap úlgeripti.

«Halyqty áleýmettik qorǵaý jáne jumyspen qamtý basqarmasynyń tapsyrysy boıynsha ashylyp otyr. Bul jerde jeti adam jumys istep jatyrmyz. Eki qyzymyz telefon qońyraýlaryn qabyldap, Call-ortalyqta otyr. Olar da óńirge baǵdarlamamen kelgen. Bireýi - Shymkenttiń týmasy, ekinshisi – Qytaıdan oralǵan qandasymyz. Sondyqtan olar kóshi-qon baǵdarlamasy jaıynda búge-shigesine deıin biledi. Áleýmetik jelide paraqshalarymyz bar, onymen arnaıy maman aınalysady. Sondaı-aq psıholog, zańger jumys isteıdi, qajetti kómek beredi», - deıdi qandastar men eldiń eńbek kúshi artyq aımaqtarynan azamattardy qabyldaý jónindegi aqparattyq keńes ortalyǵynyń jetekshisi Ánýar Toqpanov.

Ortalyq memlekettik-áleýmettik tapsyrys aıasynda qurylǵan.

«Ońtústik óńirlerden qonys aýdarǵysy keletinder kóp. Olarǵa aqparattyq kómek beremiz. Qandaı qujattar jınaý kerek, kimderge basymdyq beriledi. Qaı aýdandarda qonys aýdarýshylarǵa úıler bar, máselen, qaı aýylda muǵalim nemese mal dárigeri kerek.

Kóship kelýshilerge qoıylatyn talaptar bar, árıne. Ol kóp balaly jáne mamandyǵynyń bolýy. Dárigerlerge, muǵalimderge, veterınarlarǵa basymdyq beriledi», - deıdi Ánýar Toqpanov.

Ortalyq qyzmetkerleri sondaı-aq ońtústik óńirlerge issaparǵa shyǵyp, turǵyndarmen kezdespek. Kelesi aptada Túrkistan, Qyzylorda oblystaryna jol júrmek.

«Basqarmadaǵylar bizge bıyldyqqa kvotanyń bitkenin aıtty. Biz kelesi jylǵa kóship kelýshilermen sóılesemiz. Qonys aýdarýshylardyń 90 %-y ornyǵyp qalyp jatyr. Ketkender de bar. Birine aýa raıy jaqpady, densaýlyǵyna, jumysqa baılanysty qaıta kóshkender bar. Jalpy biz qandastar, qonys aýdarýshylar arasynda saýalnama júrgizemiz. Sonyń nátıjesi boıynsha jyldyń sońynda basqarmaǵa usynys ázirleımiz. Qandaı máseleler bar, nege basa nazar aýdarý kerek degen sııaqty», - deıdi ortalyq jetekshisi.


Joǵary qaraı