Aýa raıy
Astana -17 °S
Almaty -4 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da karantın talabyn buzǵandarǵa 53 mln teńge aıyppul salyndy

2020 jyldyń 23 qazan 2020 06:38

PETROPAVL. QazAqparat – Soltústik Qazaqstan oblysynda karantındik shekteýler bastalǵaly talaptardy buzǵandarǵa 53 mln teńge mólsherinde aıyppul salyndy, dep habarlaıdy QazAqparat tilshisi.

SQO taýarlar men kórsetiletin qyzmetterdiń sapasy men qaýipsizdigin baqylaý departamentiniń málimetinshe, naýryz aıynan beri monıtorıngtik toptardyń jumysy nátıjesinde 969 ákimshilik quqyq buzý hattamasy toltyryldy.

«Onyń ishinde 884-i qoǵamdyq orynda negizinen maska taqpaǵan jeke tulǵalarǵa, 83-i jeke kásipkerler men jaýapkershiligi shekteýli seriktestikterge jáne ekeýi laýazymdy tulǵalarǵa hattama toltyryldy. Jalpy somasy - 53 mln teńge. Basqarmalarda protsessýaldyq sheshim qabyldaý úshin polıtsııa organdarynan kelip túsken 262 materıal qaralyp jatyr», - deıdi SQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz hatshysy Aınash Saǵyndyqova.

Ótken aptada monıtorıngtik toptar negizinen qoǵamdyq tamaqtaný oryndaryn, saýda oryndaryn qamtyǵan 120 reıd ótkizdi. Polıtsııadan 83 materıal kelip tústi, 79 ákimshilik hattama toltyryldy.

«Halyq áli kúnge deıin koronavırýstyń adam ómirine qanshalyqty qaýipti ekenin túsinbeıdi. Tyǵylyp toı jasaıdy, shaqyrǵan jerlerge baryp, ózderiniń ǵana emes, qalǵan aınalasyndaǵylardyń da ómiri men densaýlyǵyna qaýip-qater týdyrady. Petropavl aýmaǵynda qoǵamdyq tamaqtaný oryndarynda otbasylyq is-sharalardy ótkizý áli de tyıylmaı otyr. Atap aıtqanda, mundaı faktiler «Green park», «Berezovaıa roa» demalys oryndarynda tirkeldi. Karantınge qaramastan, «Dodo pıtstsa» dámhanasy men «Mega planeta» dúkeniniń jumys istegeni anyqtaldy», - deıdi SQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Tatıana Gorlova.

Joǵary qaraı