Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da mamandar Mortyq aýylynda iri qaranyń neden ólgenin tekserip jatyr

2021 jyldyń 19 qazan 2021 14:46

PETROPAVL. QazAqparat – Soltústik Qazaqstan oblysy Ýálıhanov aýdanyndaǵy Mortyq aýylynda qara mal áli kúnge deıin qyrylyp jatyr, dep habarlaıdy QazAqparat tilshisi.

Mortyq aýylynyń turǵyny Buıdamhan Ábdikerimniń sońǵy úsh aıda 6 buzaýy ólgen. Sońǵysy 14 qazan kúni aram óldi.

«Aýyrǵan mal isinedi, iskeni sondaı, jarylady. Ádette qarasan aýrýynda osylaı bolady. Bul qarasan aýrýy ekenin veterınarlar da aıtyp jatyr. Kóktemde vaktsına egilgen joq. Sondyqtan bul aýrý basylar emes», - deıdi aýyl turǵyny.

Buǵan deıin shilde aıynda osy aýylda 7 buzaýdyń óleksesi tabylǵanyn aıtqan edik.

Ol joly aýylda barlyǵy 13 buzaý qyryldy. Zerthanalyq zertteýlerdiń kómegimen maldyń vırýstyq dıareıa jáne ınfektsııalyq rınotraheıtten ólgendigi anyqtaldy.

Maldyń jańadan ólýine baılanysty veterınarııa basqarmasy túsinik berdi.

«14 qazan kúni Ýálıhanov aýdany Mortyq aýylynyń turǵyny óz aýlasynda buzaýdyń ólgeni týraly habarlady. Oqıǵa ornyna aýdandyq veterınarııalyq qyzmet keldi. Ólekseni tekserý barysynda artqy aıaqtarynyń isinýi baıqaldy. Klınıkalyq belgileri emkar aýrýyna uqsas. Dál dıagnoz qoıý úshin zerthanalyq saraptama qajet. Patologııalyq materıaldar iriktelip alynyp, Nur-sultan qalasynyń veterınarııa jónindegi ulttyq referenttik ortalyǵyna jiberildi. Mortyq aýylynda barlyq janýarlar baqylaýǵa alyndy, aýrý men ólimniń jańa jaǵdaılary tirkelgen joq», - deıdi basqarma mamandary.

Janýarlardy vaktsınalaý, úı-jaılardy dezınfektsııalaý júrgiziledi.

«16 qazanda aýdannyń veterınarııalyq qyzmeti mal óleksesin mal qorymyna aparyp jaqty, ólgen orny dezınfektsııalandy. Ólgen mal talap boıynsha tez arada joıylýy kerek edi. Veterınarııa basqarmasy atalǵan fakti boıynsha oqıǵa ornyna baryp qyzmettik tergeý bastady, onyń nátıjeleri boıynsha kináli tulǵalarǵa qatysty tıisti sharalar qabyldanatyn bolady», - deıdi basqarmadaǵylar.


Joǵary qaraı