Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da meteorologtar sý qoımalaryndaǵy muz qalyńdyǵyn ólshedi

2021 jyldyń 23 qarasha 2021 16:44

PETROPAVL. QazAqparat – Soltústik Qazaqstan oblysynda «Qazgıdromet» fılıalynyń mamandary ár on kún saıyn sý qoımalaryndaǵy muz qalyńdyǵyn ólshep otyr, dep habarlaıdy QazAqparat tilshisi.

«Qazgıdromet» RMK fılıalynyń málimetinshe, óńirde muz qalyńdyǵyn ólsheıtin 19 gıdrobeket bar. Olar Esil ózeni men onyń saǵalarynda, Petropavl jáne Sergeev sý qoımalarynda, Úlken Torańǵul kólinde ornalasqan. Mamandar ár on kún saıyn sý qoımalarynda oıyq jasap, muzdyń qalyńdyǵyn ólsheıdi. Qazirgi ýaqytta onyń ortasha kórsetkishi 12 sm qurap otyr. Al Ǵ.Músirepov atyndaǵy aýdannyń Kovylnoe eldi mekeni mańynan ótetin Aqanburlyq ózeninde muz qalyńdyǵy 17 sm jetken.

«Qazirgi ýaqytta muz qaýipsiz qalyńdyqqa jetti. Tuy sýda onyń qalyńdyǵy 10 sm, al tuzdy sýda 15 sm bolǵan jaǵdaıda adam úshin qaýipsiz. Desek te, ózen saǵalarynda, tarmaqtarynda jáne qatty aǵys bar, qamys ósken jerlerde, aǵashtardyń qasynda muz berik bolmaıdy. Sondaı-aq 0 gradýstan joǵary aýa raıy úsh kúnnen artyq saqtalsa, muz beriktigi 25 %-ǵa tómendeıdi», - deıdi mamandar.

Meteorologtardyń aıtýynsha, muz kógildir bolsa – berik, aq bolsa beriktigi eki ese tómen, sarǵylt tartsa ústine shyǵýǵa qaýipti. Sondaı-aq, muz ústine oılanbastan shyǵa salýdyń arty ómirge qaýip týdyrmaq. Muz jarylyp, oıyqqa túsip ketken jaǵdaıda adam odan ońaılyqpen shyǵa almaıdy. Óıtkeni muz sheti salmaqqa shydas bermeı syna bermek. Al adam muzdy sýda 15 mınýttan artyq bola almaıdy eken.


Joǵary qaraı