Aýa raıy
Astana 30 °S
Almaty 36 °S
valıýta baǵamy
USD 412.55
EUR 468.66
RUB 5.79
CNY 58.80

SQO-da paramen ustalǵan sheneýnik 25 mln teńge aıyppul tóleıdi

2020 jyldyń 13 shilde 2020 21:04

PETROPAVL. QazAqparat – Para aldy dep kúdikke ilingen Soltústik Qazaqstan oblysy ákimdiginiń memlekettik sáýlet-qurylys baqylaý jáne lıtsenzııalaý basqarmasynyń basshysy Batyrbek Qalabaevqa qatysty Petropavl qalalyq sotynyń úkimi shyqty, dep habarlaıdy QazAqparat tilshisi.

«Soltústik Qazaqstan oblysy ákimdiginiń memlekettik sáýlet-qurylys baqylaý jáne lıtsenzııalaý basqarmasy» KMM eks-basshysy jalpy somasy 650 myń teńge shamasynda júıeli túrde para aldy dep kúdiktelgen edi.

Qylmystyq is materıaldaryna súıensek, eks-sheneýnik Aqjar aýdany Talshyq eldimekenindegi dene shynyqtyrý-saýyqtyrý keshenin salý barysynda para alǵan. Sáýir aıynda jergilikti turǵyn basqarmaǵa qurylystyń sapasyz júrgizilip jatqanyn aıtyp, shaǵymdanǵan. Merdigerge qatysty qyzmettik tekseris júrgizilip, onyń óz jumysyn salǵyrt atqarǵany anyqtaldy. Nátıjesinde ákimshilik jaýapkershilikke tartylyp, olqylyqtardyń ornyn toltyrý týraly nusqama beriledi. Qarasha aıynda memlekettik sáýlet-qurylys baqylaý jáne lıtsenzııalaý basqarmasyna Aqjar aýdandyq prokýratýrasynan tapsyrys berýshi – aýdandyq qurylys bólimine qatysty tekseris júrgizýge tapsyrma túsedi.

«Tekseris júrgizýi tıis mekeme basshysy Qalabaev uıaly telefon arqyly Aqjar aýdany ákiminiń orynbasary Dosymbekovke qońyraý shalyp, bólimge tekseris júrgiziletinin eskertken. Sondaı-aq prokýratýra haty boıynsha oǵan kelip kezdesý qajettigin aıtqan», - delingen is materıaldarynda.

Nátıjesinde is-shara qoldanbaý úshin jylqynyń jarty etiniń quny – 110 myń teńgege kelisedi.

2019 jyldyń kókteminde Aıyrtaý aýdany eki mekteptiń shatyryna kúrdeli jóndeý júrgizbek bolyp konkýrs jarııalaıdy. Eki merdigermen jáne tehbaqylaý júrgizetin kompanııamen kelisimge otyrady. Nysandar jóndelip, paıdalanýǵa beriledi. Biraq keıin prokýratýra tekseris barysynda qurylystyń sapasyz júrgizilgenin anyqtaǵan.

Qalabaev bul jerde de isti óz paıdasyna sheshpek bolady. Sheneýnik bilim bólimi jetekshisi Kenjebolatovqa 250 myń teńge qaryz eken. Ony araǵa salyp, tehbaqylaý júrgizgen kompanııanyń zańgeri Kısılevten isti «oń sheshý» úshin 250 myń teńge «syıaqy» suratqan.

Úshinshi jaǵdaı Taıynsha aýdany Makashevka eldimekeninde salynǵan mehanıkalandyrylǵan qyrman qurylysyna baılanysty. Nysan ıesi qurylysty ruqsat qujattarsyz bastap ketken. Ol jobalyq qujattardy jasap, iske qosýǵa ruqsat alyp berem degen Avhadov degen jańa tanysynyń sózine senip qalǵan. Alaıda ol qyzmeti úshin aqshany alǵanymen, óz mindettemesin oryndaı almaǵan. Avhadov tanysy, sáýlet-qurylys baqylaý jáne lıtsenzııalaý basqarmasyndaǵy bólim basshysy Kenjebolatovtan kómek suraıdy. Nysandy iske qosý aktisine qol qoıý úshin 400 myń teńge bermek bolady. Kenjebolatov bul máseleni bastyǵy Qalabaevpen sheshpek bolady.

Bıyl qańtar aıynda Kenjebolatov basqarma basshysy Qalabaevtyń kabınetinde Avhadovtan alynǵan paranyń bir bóligi – 200 myń teńgeni aldyn ala kelisim boıynsha oǵan berip jatqan kezde qolǵa tústi.

Qalabaev, Kenjebolatovpen birge para bergen Kıselev pen Avhadov ta jazaǵa tartyldy. Bári óz kinásin moıyndady.

Petropavl qalalyq sotynyń úkimimen Qalabevqa alǵan parasynan 35 ese kóp mólsherde – 26,6 mln teńge aıyppul salyndy. Qamaýda jáne úı qamaqta otyrǵan ýaqyty eskerilip, aıyppul mólsheri 25,6 mln teńgege deıin qysqartyldy.

Al Kenjebolatov 21,5 mln teńge aıyppul tóleıtin boldy. Eki eks-sheneýnik te memlekettik qyzmette laýazymǵa taǵaıyndalý quqyǵynan ómir boıyna aıyryldy.

Para bergen Kıselev pen Avhadov sáıkesinshe 3,7 mln jáne 6 mln teńge aıyppul tólemek. Sot úkimi ázirshe zańdy kúshine engen joq.


Joǵary qaraı