Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da polıtseıler bir otbasyn órtten qutqaryp qaldy

2021 jyldyń 1 jeltoqsan 2021 15:10

PETROPAVL. QazAqparat – Soltústik Qazaqstan oblysynda polıtseıler órt shyqqan úıden otbasyn shyǵaryp, jalynnyń taralýyna jol bermedi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Taıynsha aýdanynyń ortalyǵyndaǵy úılerdiń birine japsarlas salynǵan qoradan túngi saǵat 3.30 shamasynda órt shyqqan. Qalyń uıqydaǵy qalanyń ústine úıirilgen tútindi polıtsııanyń keshendi kúshteri quramynda patrýlde júrgen aýdandyq polıtsııa bóliminiń qyzmetkerleri Altynbek Omarov, Mıras Qorlanov men Taırqan Sháripov baıqap qalady. Olar birden aýdandyq polıtsııa bóliminiń kezekshilerine jáne órt sóndirý qyzmetine oqıǵa jaıly habarlap, ózderi turǵyndarǵa kómekke umtylady. Qorshaýdan sekirip túsip, terezeni qaǵyp, úı ishindegi erli-zaıyptylardy oıatqan. Bes mınýt ishinde jaqyn mańda júrgen taǵy eki jasaq kómekke kelgen. Órt sóndirýshiler kelip jetkenshe tártip saqshylary jáne úı ıeleri tizbekpen tura qalyp, qudyqtan shelektep sý quıyp órttiń taralýyna jol bermegen. Órtengen qoradaǵy taýyqtar ólip qalǵan, basqa mal aman, turǵyn úıge zaqym kelgen joq. Keshikpeı kelip jetken órt sóndirýshiler órtti sóndirdi.

«Órtti aýyzdyqtaýǵa Erlan Ysmaıylov, Qýanyshbek Temirbekov, Ánýar Kenjalınov, Almaz Moldashev pen Aıtpaı Rahmetov qatysty. Kezekshilikke túsetin polıtsııanyń keshendi kúshteri quramyna patrýldik polıtseılerden ózge ýchaskelik polıtsııa ınspektorlary jáne basqa bólinisterdiń qyzmetkerleri kiredi. Olardyń barlyǵy daǵdarys jaǵdaıynda jaqsy daıarlyqtaryn, jedel áreket etip, sheshim qabyldaı alatyndyqtaryn kórsetti», - deıdi Taıynsha aýdany polıtsııa bólimi bastyǵynyń mindetin atqarýshy Arǵyn Amanbaev.


Joǵary qaraı