Aýa raıy
Astana -18 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da Shoqyný merekesinde sýǵa túsýge 16 oryn ázirlendi

2021 jyldyń 19 qańtar 2021 03:42

PETROPAVL. QazAqparat – Soltústik Qazaqstan oblysynyń sý aıdyndarynda Shoqyný merekesinde sýǵa shomylýǵa 16 oryn ázirlendi, onyń ekeýi - Petropavlda, dep habarlaıdy QazAqparat tilshisi.

SQO tótenshe jaǵdaılar departamenti baspasóz qyzmetiniń málimetinshe, Petropavlda sýǵa shomylýǵa arnalǵan oryn Esil ózeniniń qalalyq jaǵajaıy mańynda jáne Ózen porty aýdanynda bolady.

«Qaıǵyly oqıǵaǵa jol bermeý úshin sý aıdyndarynyń muz qalyńdyǵy aldyn ala ólshendi. Qalalyq jaǵajaı mańynda Esil ózeniniń muz qalyńdyǵy 18-30 sm, Ózen portynda 30-40 sm, al óńirdiń kólderinde 30-70 sm shamasynda.

Búgin saǵat 22.00-den bastap shomylýǵa arnalǵan oryndarda qutqarýshylar kezekshilikti bastaıdy. Budan basqa polıtseıler, jedel járdem qyzmetkerleri, jergilikti atqarýshy bılik ókilderi jáne volonterler bolady. Sondaı-aq jylytý oryndary qarastyrylǵan», - deıdi SQO tótenshe jaǵdaılar departamenti bastyǵynyń orynbasary Marat Qanǵojınov.

Al halyq arnaıy jaraqtandyrylmaǵan oryndarda sýǵa túspeýi úshin monıtorıngtik toptar jumys istemek. Jalpy oblys boıynsha Shoqyný merekesinde sýǵa shomylýǵa 16 oryn ázirlengen.

«Aıyrtaý aýdanynda 5 oryn, Qyzyljar aýdanynda – 4, Ǵ.Músirepov aýdanynda – 1, Esil, Shal aqyn aýdandarynda ekeýden. Barlyq jergilikti ákimdikterge qaýipsizdikti saqtaýǵa baılanysty usynystar jiberildi. Sondaı-aq karantınge baılanysty mindetti túrde áleýmettik ara qashyqtyq saqtalady. Kezekshilik barysynda muny baqylaýǵa alamyz», - deıdi Marat Qanǵojınov.

Mamandardyń aıtýynsha, bıyl Shoqyný merekesinde aýa raıy sýǵa shomylýǵa qolaıly, qatty aıaz joq. 19 qańtarda túnde mınýs 15-17 gradýs, keı jerlerde synap baǵanasy mınýs 25 gradýsqa deıin túspek. Kúndiz 12-15 gradýs aıaz bolmaq.


Joǵary qaraı