Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

SQO-da joldaǵy olqylyqtar úshin 100-den astam laýazymdy tulǵa jazalandy

2021 jyldyń 12 qazan 2021 09:55

PETROPAVL. QazAqparat – Soltústik Qazaqstan oblysynda polıtseıler jyl basynan 7 myń shaqyrymnan astam avtojoldy tekserdi, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, óńirdegi avtojoldardyń jalpy uzyndyǵy – 9364 shaqyrym, onda 135 baǵdarsham, 17825 jol belgisi ornalasqan. Jol-kólik ınfraqurylymynyń durys bolýy – jol qaýipsizdiginiń mańyzdy faktory. Sol sebepti ákimshilik polıtsııa qyzmetkerleri ony únemi tekserip otyrady. Osyndaı tekseris barysynda joldarda negizinen oı-shuńqyrlar jáne keı belgilerdiń eskirgendigi anyqtalady.

Polıtseıler oqý oryndarynyń biriniń dırektoryn ákimshilik jaýapkershilikke tartty. Ol mekeme aldyna «kirýge tyıym salynady» belgisin jáne onyń astyna normatıvtik aktilerde kózdelmegen «qyzmettik kólikten basqa» jazýy bar taqtaıshasyn orynsyz ornatqany úshin jazalandy. Tártip saqshylarynyń aıtýynsha, bul jaǵdaıda «qozǵalysqa tyıym salynady» belgisin ornatý kerek, nátıjesinde uıym qyzmetkerleri men qyzmet kórsetetin kólikter kedergisiz kirýge múmkindik alady.




«Jyl basynan 908 tekserý júrgizilip, 7 myń shaqyrymnan astam jol qamtyldy. Nátıjesinde, 1802 olqylyq anyqtaldy. Múddeli sýbektilerdiń atyna kemshilikterdi joıý týraly 773 uıǵarym shyǵaryldy. 122 laýazymdy tulǵa jaýapkershilikke tartyldy. Sonymen qatar, apattylyqty azaıtý jáne jol qaýipsizdigin nyǵaıtý úshin jol-kólik ınfraqurylymyn jetildirý boıynsha 212 usynys ázirlendi, olar jergilikti atqarýshy organdarǵa jiberildi. Mysaly, jaryq dıodty belsendi jol belgileriniń jetkiliksiz sany kórsetilgen. Bul – júrgizýshilerdiń nazaryn aýdarýdyń tıimdi quraly. Qazirgi ýaqytta Petropavl jol jelisiniń jandanǵan 6 ýchaskesinde osyndaı belgiler ornatylyp jatyr», - deıdi SQO PD ákimshilik polıtsııa basqarmasynyń bastyǵy Serik Áljanov.

Jyl boıy ákimshilik polıtsııanyń uıǵarymy boıynsha jalpy aýdany 127 myń sharshy metr shuńqyr jóndeldi, 400 myń sharshy metrge jol belgisi salyndy, 1400-den astam jol belgileri ornatyldy jáne aýystyryldy.


Joǵary qaraı