Aýa raıy
Astana 6 °S
Almaty 17 °S
valıýta baǵamy
USD 421.58
EUR 496.83
RUB 5.53
CNY 62.20

SQO-nyń emdeý mekemelerine bıyl 120 jas dáriger kelmek

2020 jyldyń 5 tamyz 2020 07:16

PETROPAVL. QazAqparat – Soltústik Qazaqstan oblysynda turǵyndarǵa medıtsınalyq qyzmettiń ýaqtyly, tolyq jáne sapaly kórsetilýin baqylaıtyn monıtorıngtik top atqarylǵan jumysty qorytyndylady, dep habarlaıdy QazAqparat tilshisi.

Búgin Petropavlda densaýlyq saqtaý mekemeleriniń halyqqa medıtsınalyq qyzmet kórsetý sapasyn, ýaqtyly jáne tolyq atqarylýyna monıtorıng júrgizetin toptyń jumysy týraly brıfıngte SQO Sybaılas jemqorlyqqa qarsy qyzmet jetekshisiniń birinshi orynbasary, monıtorıngtik top jetekshisi Nurlan Jahın aıtyp berdi.

SQO-da prokýratýranyń bastamasymen barlyq múddeli vedomstvo men uıymdardyń basyn biriktirgen Ahýal ortalyǵy qurylǵan. Ol koronavırýsqa qarsy júrgizilip jatqan is-sharalardy kúndelikti baqylaýda ustap otyr. Bes top qurylǵan, olar - jedel áreket etý, medıtsınalyq preparattar baǵasyn negizsiz ósirý derekterin jáne turǵyndarǵa medıtsınalyq qyzmettiń ýaqytyly, tolyq, sapaly kórsetilýin baqylaý, karantındik is-sharalardyń oryndalýyn jáne memlekettik materıaldyq rezervtiń qamtylýyn qadaǵalaý toptary.

«Biz kúndelikti qoǵamdyq pikirdi, jedel aqparatty zerdeleımiz. Provızorlyq jáne ınfektsııalyq statsıonarlarda em alyp jatqan naýqastardyń qaýipsizdigin qadaǵalaımyz. Biz úshin halyqtyń tıisti em-dom alyp, zerthanalyq zertteýlerden der kezinde ótkeni mańyzdy. Lıder.kz qozǵalysynyń volonterlerimen oblystaǵy barlyq statsıonarlardy aralap shyqtyq. Ókpeni jasandy jeldetý apparattarynyń, ottegi kontsentratorlarynyń, medpreparattardyń barlyǵyna monıtorıng júrgizdik. Qansha qajet ekenin anyqtap, ol jaıynda habarladyq», - deıdi Nurlan Jahın.

Qazirgi tańda SQO-da emhanalarda 98 mobıldi top jumys isteıdi, olardyń sany 5 ese artyp otyr. Qosymsha 40 kólik bólingen. Barlyǵy 1 186 medıtsınalyq qyzmetker tartylǵan.

«Bıyl óńirge medıtsınalyq joǵary oqý oryndarynyń 120 túlegi keledi. Olardyń 12-si oblysta jumysqa ornalasty. Jergilikti bıýdjet esebinen byltyrdan beri 76 adam rezıdentýrada oqyp jatyr, bıyl olardyń qataryna taǵy 26 adam qosylmaq», - deıdi monıtorıngtik top jetekshisi.

Oblysta ókpeni jasandy jeldetý apparatynyń 100 danasy bolsa, sonyń 59-y syrqattardyń emine qoldanylýda. Jaqynda óńirge taǵy 162-si ákelinbek. Ottegi kontsentratorlarynyń sany 18-den 113-ke deıin jetti. Jergilikti bıýdjet esebinen 300 mln teńgege 5 ottegi stansasy salynady.

«Ahýal ortalyǵyna jedel járdem qyzmetiniń jumysyna qatysty shaǵymdar túsken joq. Búginde shaqyrtýlar sany 45% azaıǵan. Oblysta dári-dármek jetispeýshiligi joq. Statsıonarlarda eki aptalyq qor bar. Dárihanalarda dúrmek basylǵan, baǵalardy baqylaýda ustap otyrmyz. Soltústikqazaqstandyqtarǵa ahýal ortalyǵyna «109» nómiri arqyly nemese 8 707 564 14 24 telefon nómiri arqyly Qoǵamdyq baqylaý kartasyna habarlasýǵa bolatynyn eske salamyn. Barlyq aryz-shaǵymdaryńyz tekserilip, nazarsyz qalmaıdy», - deıdi Nurlan Jahın.


Joǵary qaraı