Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Sońǵy 2 jylda 800-den astam qazaqstandyq stýdent halyqaralyq baıqaýlardyń jeńimpazy atandy

2021 jyldyń 16 maýsym 2021 15:46

NUR-SULTAN. QazAqparat - Qazaqstandyq memlekettik joǵary oqý oryndarynyń 800-den astam stýdenti sońǵy 2 jylda halyqaralyq olımpıadalar men konkýrstardyń jeńimpazy atandy, dep habarlaıdy QazAqparat QR Bilim jáne ǵylym mınıstrliginiń baspasóz qyzmetine silteme jasap.

Ulttyq jáne memlekettik joǵary oqý oryndarynyń 800-den astam stýdenti sońǵy eki jylda halyqaralyq olımpıadalar men konkýrstardyń jeńimpazdary atandy. Stýdentterdiń jetistikteri boıynsha úzdik 5 memlekettik joǵary oqý oryndarynyń qataryna L.N.Gýmılev atyndaǵy EUÝ, Abaı atyndaǵy QazUPÝ, ál-Farabı atyndaǵy QazUÝ, Qaraǵandy tehnıkalyq ýnıversıteti, M. Ótemisov atyndaǵy Batys Qazaqstan ýnıversıteti kirdi.

Mysaly, ótken oqý jylynda L. N. Gýmılev atyndaǵy EUÝ-diń 87 stýdenti IV Búkilreseılik olımpıadada, «CISCO STARS-2019» jelilik tehnologııalar boıynsha halyqaralyq olımpıadada, halyqaralyq pándik olımpıadada, Regional Final of Huawei ICT Competition in Eurasia 2019-2020 jáne basqa da jarystarda júldeli oryndarǵa ıe boldy.

Sondaı-aq EUÝ stýdentteri pándik olımpıadalarda ǵana emes, túrli shyǵarmashylyq jáne sporttyq jarystarda joǵary nátıjelerge qol jetkizdi. Máselen, «E-STUDIO» vokalısteri Ýkraına men Ózbekstandaǵy halyqaralyq baıqaýlardyń jeńimpazdary atandy. Dombyrashy-stýdentterden quralǵan «Dala sazy» orkestri «DUBAI MUSIC FESTIVAL-CONTEST» halyqaralyq baıqaýynda jeńiske jetti. Ál-Farabı atyndaǵy QazUÝ stýdentteri halyqaralyq olımpıadalarda bilim deńgeıleriniń jaqsy ekenin kórsetti. Joǵary oqý ornynyń stýdentteri POSCO halyqaralyq qorynyń (Koreıa), Heiwa Nakajima Foundation (Japonııa), «MOPGA» (Frantsııa) stıpendıattary, sondaı-aq «Erasmus», DORA halyqaralyq granttarynyń ıegerleri atandy.

Abaı atyndaǵy QazUPÝ stýdentteri de kózge tústi. 2020 jyly bul oqý orny pedagogıkalyq JOO stýdentteri arasynda jaratylystaný-ǵylymı pánder boıynsha ótken halyqaralyq olımpıadada júldeli orynǵa ıe boldy. Sonymen qatar 18 stýdent pen magıstrant QR Bilim jáne ǵylym mınıstrliginiń I, II, III dárejeli dıplomdaryna ıe boldy. Sonymen birge QazUPÝ bilim alýshylary stýdentter men magıstranttar arasynda respýblıkalyq pándik olımpıadalar men ǵylymı-zertteý jumystary konkýrstarynyń jeńimpazdary atandy.

Óńirlik joǵary oqý oryndarynyń oqýshylary da joǵary nátıje kórsetti. Máselen, Qaraǵandy tehnıkalyq ýnıversıtetiniń stýdentteri «Terricone valley IT-WEEK.KZ 2019» halyqaralyq forýmynyń hakatonynda birinshi orynǵa ıe bolyp, basqa da halyqaralyq stýdenttik konkýrstar men ǵylymı-zertteý jobalarynda joǵary nátıjege qol jetkizdi.

Stýdentterdiń jetistikteri boıynsha úzdik bestikti M.Ótemisov atyndaǵy Batys Qazaqstan ýnıversıteti qortyndylady. JOO-nyń 50-den astam stýdenti Halyqaralyq ǵylymı-zertteý konkýrstary men olımpıadalardyń jeńimpazdary atandy.


Joǵary qaraı