Aýa raıy
Astana -10 °S
Almaty -12 °S
valıýta baǵamy
USD 421.58
EUR 496.83
RUB 5.53
CNY 62.20

Tarazda qoǵamdyq orynda sanıtarlyq talapty buzǵandarǵa eskertý jasaldy

2020 jyldyń 4 jeltoqsan 2020 00:56

TARAZ. QazAqparat – Taraz qalasyndaǵy qoǵamdyq kólik, dúkender men kafelerge reıd júrgizildi, dep habarlaıdy QazAqparat tilshisi.

Taraz qalasy ákimdiginiń uıymdastyrýymen shahar turǵyndaryna sanıtarlyq talaptardy saqtaý jóninde túsindirý jumystary júrgizilýde.

Osy oraıda Taraz qalasy ákiminiń orynbasary Almas Sadýbaev bastaǵan túsindirý toby keshkilik reıdke shyǵyp, aıaldamalar men qala ishindegi avtobýstardaǵy jaǵdaıdy zerdeledi.

Іshine shamadan tys adam toltyryp alǵan qoǵamdyq kólik júrgizýshileri men maska taqpaǵan jolaýshylarǵa saqtyq sharalaryn ustaný jóninde eskertý jasaldy.

«Jyl basynan beri Taraz qalasynda 1990 adam indet juqtyrdy. Jaǵdaı birshama turaqtanǵanymen, qarasha aıynda indettiń órshýi qatty baıqalyp otyr. Koronavırýs aýrýynyń saldarynan sońǵy eki aptada shaharymyzdyń 11 turǵyny kóz jumdy. Qazirgi tańda ınfektsııalyq aýrýhanada 104 adam jatsa, 51 turǵyn úı jaǵdaıynda em qabyldap jatyr. Іndet juqtyrǵandardyń deni jasy elýden asqandar. Olar vırýs qalaı, qaıdan juqqanyn tap basyp aıta almaı otyr. Aıtýlarynsha, naýqastar aýyrmaı turyp shaqyrǵan jıyn-toılardan qalmaǵan. Sondyqtan da biz adamdar tamaqtanatyn jáne jıi shoǵyrlanatyn basqa da oryndarǵa, qoǵamdyq kólikterge reıd jasap, turǵyndarǵa túsindirý jumystaryn júrgizip jatyrmyz. Óıtkeni saqtyq sharalaryna qatań mán bermesek, erteńgi kúni opyq jep qalýymyz múmkin», – deıdi Taraz qalasynyń memlekettik bas sanıtar dárigeri Rıta Altynbasova.

Jalpy reıd barysynda «Dámdes» sýpermarketi sekildi iri saýda oryndary men ózge de dúken-dúńgirshikterdegi, «DISKOVERY», «Izıým» dámdi palaý» syndy birqatar tamaqtaný oryndaryndaryna da zerdeleý jumystary júrgizildi.

Daıashy ne satýshylary tutynýshylarǵa medıtsınalyq qolǵapsyz qyzmet kórsetip jatqan nemese ishinde tutynýshylary maskasyz júrgen, dene qyzýyn ólsheıtin qurylǵysy joq nysan ákimshisine eskertý jasalyp, túsindirý jumystary júrgizildi.

Sonymen qatar saqtaný sharalary jazylǵan paraqshalar taratyldy.

«Qalamyzda kún sanap koronavırýspen aýyrǵandar sany artyp jatyr. Eń basty másele — azamattarymyzdyń densaýlyǵy. Sondyqtan Taraz qalasynda 12 mobıldi top adam kóp jınalatyn jerlerde tekserý jumystaryn júrgizýde. Meıramhanalar men as ishetin ortalyqtarda kóptegen azamattar jınalyp otyrady. Eger 1 adam aýyratyn bolsa, sol jerdegi barlyq adamǵa juqtyrady. Sondyqtan osy máseleni qolǵa alyp, tekserý jumystaryn kúsheıtip jatyrmyz», - deıdi Taraz qalasy ákiminiń orynbasary Almas Sadýbaev.








Joǵary qaraı