Aýa raıy
Astana -12 °S
Almaty -5 °S
valıýta baǵamy
USD 421.58
EUR 496.83
RUB 5.53
CNY 62.20

Tarazda nan baǵasy oblys ákimdiginiń aralasýymen qaıta arzandady

2020 jyldyń 26 qazan 2020 23:06

TARAZ. QazAqparat – Ótken demalys kúnderi Taraz qalasyndaǵy dúkenderde nan baǵasy 5-10 teńgege óskendigi baıqalǵan bolatyn. Bul sheshim jergilikti bılikpen kelisilmegen kúıi qabyldanǵan. Jedel shtab qazir jaǵdaıdy jan-jaqty zerdeleý ústinde, dep habarlaıdy QazAqparat tilshisi oblys ákimdiginiń resmı saıtyna silteme jasap.

Oblys ákimdigi tarapynan shuǵyl shara qabyldanǵannyń arqasynda dúısenbi kúni iri saýda oryndarynda as atasy burynǵydaı 85 teńgeden satyla bastady. Tek aýlalardaǵy shaǵyn dúkenderdiń keıbirinde nan 5-10 teńgege qymbatyraq bosatylyp jatyr.

Taraz qalasynda negizgi 6 naýbaıhana bar. Olardyń beseýi baǵany ósirý týraly sheshimge kelgen kórinedi. Nannyń qymbattaýyn olar soltústik óńirlerden keletin un qunynyń artýymen túsindirip otyr.

Oblys ákiminiń orynbasary Berik Nyǵmashev turǵyndardy sabyrǵa shaqyryp, jaǵdaıdyń retteletinin jetkizdi.

«Monıtorıng kezinde birqatar nan óndirýshiler nan baǵasyn 85-ten 95 teńgege deıin ósirgeni anyqtaldy. Qazir jedel shtab bunyń qanshalyqty qısyndy ekenin anyqtaý maqsatynda tekseris júrgizýde. Jergilikti bılikpen aqyldaspaı áreket etken kásipkerler jaýapqa tartylady», - dedi ol.

Tıisti monıtorıng jumystary monopolııaǵa qarsy jáne salyq organdarymen birlese júrgizilýde.

«Nan baǵasy birneshe faktorǵa baılanysty. Biraq eń negizgisi – unnyń baǵasyna kelip tireledi. Al, qazir unnyń quny 115 teńgeden 130-140 teńgege deıin ósip ketken», - dep atap ótti Berik Nyǵmashev.

Aımaq basshysynyń orynbasary qalyptasqan jaǵdaıdy jan-jaqty zerdeleý úshin barlyq sharalar qoldanylatynyna sendirdi.

«Esterińizde bolar, ótken jyly osy ýaqytta nan baǵasy ósken bolatyn. Sondyqtan da bıyl nan baǵasyn ustap turýǵa baǵyttalǵan aldyn alý sharalary qabyldanyp, naýbaıhanalarǵa un naýryz aıynan qazanǵa deıin turaqtandyrý qorynan tómen baǵamen berilgen. Qazir turaqtandyrý qorynda 500 tonna un bar. Qosymsha taǵy 2 000 tonna alynady. Oblys ákimi áleýmettik mańyzy bar taýarlardyń, onyń ishinde nannyń baǵasynyń negizsiz ósýine jol bermeýdi tapsyrdy. Biz jaǵdaıdy turaqtandyrý úshin barlyq sharalardy qoldanatyn bolamyz. Qajetti resýrstarymyz jetkilikti. «Taraz» ÁKK un satyp alyp, nan óndirýshilerge tómendetilgen baǵamen usynbaq»,- deıdi oblys ákiminiń orynbasary.

Aıta ketý kerek, «Taraz» ÁKK áleýmettik dúkenderinde as atasy 55 teńgeden satylýda.


Avtor Saıa Sembaı
Basty sózder: Aımaq, Jambyl oblysy, Qoǵam, Ákimdik,
Joǵary qaraı