Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Tarazda uzyndyǵy 850 metrlik «Úshbulaq» jaǵalaýy paıdalanýǵa berildi

2021 jyldyń 13 jeltoqsan 2021 23:10

TARAZ. QazAqparat - El Táýelsizdiginiń 30 jyldyǵyna oraı Taraz qalasynda tańǵajaıyp demalys orny – «Úshbulaq» jaǵalaýy paıdalanýǵa berildi. Oblys ákiminiń bastamasymen qolǵa alynǵan «Tarazǵa tartý» jobasy aıasynda salynǵan nysan qurylysy «Qazfosfat» JShS-iniń demeýshiligimen júzege asqan. Ol úshin seriktestik 300 mln. teńge qarjy jumsaǵan.

Qaıta jańǵyrtýdan soń tamasha keıipke engen jaǵalaýdyń ashylýyna oblys ákimi Berdibek Saparbaev qatysyp, turǵyndardy qýanyshymen quttyqtady.

- Oblys ortalyǵy sanalatyn Taraz qalasy kóptegen qonaqtar men týrısterdiń turaqtaıtyn orny. Sondyqtan shahardyń shyraıyn arttyrý, jaıly orta qalyptastyrý – bizdiń mereıli mindetimiz.

«Tarazǵa tartý» jobasy aıasynda jyl basynan beri qanshama alleıalar, saıabaqtar jóndelip, salynyp, paıdalanýǵa berildi. Kópqabatty úılerdiń qasbetteri syrlandy.

Kórkem gımnastıka jáne ústel tennısi sport kesheni, Anaǵa taǵzym ortalyǵy, Ana men bala skveri jáne taǵy da basqa nysandar boı kóterdi. Bulardyń barlyǵy demeýshilerdiń qoldaýymen iske asty.




Búgingi «Úshbulaq» jaǵalaýyn da óńirimizdegi iri kásiporyn «Qazfosfat» JShS-i salyp berip otyr. Bul jaǵalaý tarazdyqtar men qala qonaqtarynyń súıikti demalys ornyna aınalaryna senimdimin,-degen aımaq basshysy atalǵan kompanııa basshylyǵy men jumysshylaryna turǵyndar atynan alǵys aıtyp, Alǵys hat tabystady.

- Taraz – tek Qazaqstandaǵy ǵana emes, álemdegi eń kóne qalalardyń biri. Tarıhy tereń qalanyń ajaryn arttyrý jolyndaǵy bizdiń jumysymyz óz nátıjesin berdi dep oılaımyn. Osyǵan óz úlesimizdi qosqanymyz biz úshin úlken mártebe. Shaharymyz kórkeıip, damı bersin,-dedi JShS bas dırektory Nurhan Nurlanuly.

Budan soń qonaqtar oblys ákimimen birge jańa nysandy aralap, tanysty.

Aıta keteıik, jaǵalaý D.Qonaev kóshesinen Zerbulaq kóline deıin jalǵasady. Uzyndyǵy – 850 metr.

Jaǵalaý jaıaý júrginshiler jolynan bastalady. Sý ortasynda dıametri 19 metr bolatyn «Jasandy aral» (pırs) salynǵan. Aralda qazaqy jylnamadaǵy jyl basy bolýǵa talasqan janýarlardyń músinderi ornalasqan. Jasandy aral kópir arqyly jaıaý júrginshiler jolyna qosylǵan.




Jaǵalaýdyń sol jaq qanaty mármár túıirshikterinen jasalǵan oıý-órnektermen bezendirilgen. Uzyndyǵy 60 metr bolatyn aspaly kópir de kúrdeli jóndeýden ótip, túngi jaryqtandyrýmen qamtylǵan.

Sondaı-aq, munda zamanaýı «Street workout» sport alańshasy men átkenshek ornalasqan. Uzyndyǵy 450 metrdi quraıtyn velojol da bar. «Úshbulaq» jaǵalaýy boıynda 3 pandýs, 40 oryndyq pen qoqys jáshikteri qoıylǵan. Jaıaý júrginshiler jolyna 4 myń sharshy metr órnektas tóselgen.

Jaǵalaýǵa kelýshilerge barlyq jaǵdaı jasalǵan. Kún batqanda qosylyp, tań atqanda óshetin jaryqtandyrý baǵandary men 1000 sharshy metrlik kólik turaǵy salynǵan.

Jaǵalaý keńeıtilip, túbi tegistelip, baldyr basyp ketpes úshin qıyrshyq tas tóselgen. Aldaǵy ýaqytta jaǵalaý sýyna balyq jiberý josparlanýda.

- Jyl ótken saıyn súıikti qalamyz jańaryp, kórkeıip keledi. Bıyldyń ózinde kóptegen demalys oryndary paıdalanýǵa berildi. Búgingi jaǵalaý da biz úshin mereke qarsańyndaǵy tamasha tartý bolyp otyr. Memleket, oblys basshylyǵyna, osyǵan atsalysqan kásiporynǵa úlken alǵysymyzdy aıtamyz,-deıdi qala turǵyny, zeınetker Qadirkúl Álimqulova.











Joǵary qaraı