Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Tarazdyq kópbalaly polıtseı 4 jetimdi baýyryna basqan

2021 jyldyń 9 mamyr 2021 17:28

NUR-SULTAN. QazAqparat - Birneshe jyl buryn Jambyl oblysynyń polıtsııa departamentinde erekshe tapsyrmalar jónindegi aǵa ınspektor bolyp jumys isteıtin Dılıafrýz Kenjehanova óziniń bes balasynyń ústine ata-ana qamqorlyǵynsyz qalǵan tórt balany asyrap alǵan bolatyn. QazAqparat tilshisine bergen suhbatynda Batyr ana mundaı batyl áreketke ne túrtki bolǵanyn aıtty.

- Áýeli mundaı qadamǵa barýyńyzǵa ne sebep bolǵanyn aıtyp berińizshi. Bala asyrap alý kópten beri oıyńyzda júrip pe edi?

- 2019 jyly bilim salasyna jaýapty mamandarmen birge «Mektepke jol» aktsııasyn №55 mektepte ótkizdik. Komıssııanyń quramynda men de bar edim. Mektepke baratyn qujattary joq balalar men azamattyq almaǵan ata-analardy sol aktsııa kezinde kóptep jolyqtyrdyq.

Aktsııa barysynda bir qarııa úsh ret kelip kómek surady. Birneshe ret kelgenin baıqap, qandaı máseleni sheshe almaı júrgenin ózinen suradym. Sóıtsek, úıinde kámeletke tolmaǵan tórt bala bar eken.

Shesheleri tórteýin qarııaǵa tastap, ózi iz-tússiz ketken. Іzdeý jarııalanǵanymen, nátıje bolmaǵan. Balalar mektep jasyna kelgenimen, bastarynda qujat bolmaǵan. Qarııanyń kóńilin jaılandyryp, úıine qaıtardyq.

Keshke ózimiz baryp, balalarmen tanysatynymyzdy aıttyq. Jumys bitken soń ýáde boıynsha bir top komıssııa múshesi aıtylǵan mekenjaıǵa bardyq. Balalardyń ómir súrip jatqan jaǵdaıy adam kórgisiz edi.

Sanıtarlyq talap saqtalmaǵan, qýyqtaı bólmeniń kópten beri tazalyq kórmegeni birden baıqaldy. Qasymyzda qamqorshylar keńesiniń ókili júrgen. Ol dereý jetinshekterdi balalar úıine jóneltý kerek degen sheshim shyǵaryp, tıisti akt jasady.

Álgi qarııa muny estip jylap jiberdi. «Kómektesem degen ýádelerińiz qaıda? Balalar úıine tapsyrýdy men bilmeıdi deısizder me» dep renjidi.

Zańǵa salsaq, eshbir týysqany bolmaǵandyqtan, balalar memlekettik mekemege berilýi kerek bolatyn nemese asyrap alatyn qamqorshy tabý kerek edi.

Balalardy jetimder úıine ótkizsek, 73-tegi qarııanyń qusadan aıyǵa almaı ketetinin túsindim. Jarty saǵat oılanǵan shyǵarmyn, aqyry álgi balalardy patronattyq tárbıege alamyn dep sheshtim. Áli kúnge deıin olardyń anasyn izdep jatyrmyz.

Tabý úshin qoldan kelgenniń bárin jasaımyn. Bir jaǵynan bes balanyń anasy retinde beıkúná sábılerdiń taǵdyryna beıjaı qaraı almadym.

Ekinshi jaǵynan bul meniń jumysymmen tyǵyz baılanysty sharýa edi. Sondyqtan otbasymnyń kelisimin alǵan soń balalar men qarııany óz úıimizge kóshirip aldyq.

- Ózińizdiń bes balańyz bar eken. Oǵan taǵy 5 adamdy qosyp alý qıyn bolǵan joq pa?

- Durys aıtasyz. Biraq basqa ne isteı alatyn edim? Qarııany qıyndyqtyń ortasynda qaldyra almadym. Óıtkeni eń basynda kómektesýge ýáde bergen men edim. Bul tipti ofıtserdiń emes, ananyń serti bolatyn. Nelikten ekenin bilmeımin, biraq ózimdi olarǵa kómektesýge mindetti sııaqty sezindim.

- Bul sheshimdi jaqyndaryńyz qalaı qabyldady?

- Ata-anam tańǵaldy. «Kún saıyn mundaı jaıttyń túr-túrin kóresiń. Nege dál osy balalardy tańdadyń» dep surady. Naqty neniń áser etkenin olar túgil ózim de túsinbeımin. Bir biletinim, qarııa men kishi qyzdyń aıanyshty hali qatty áser etti.

Meniń de Dıana atty qyzym bar. Sondyqtan bolar, qyzymmen attas 5 jasar balany taǵdyrdyń qatal synyna qarııamen birge qaldyrýǵa uıatym jibermedi. Úıge ákelgen soń kıimderin aýystyryp, jańadan ómir bastatýǵa tyrystym.

Eski kıimderi men buıymdaryn sol jerde qaldyrdyq. Bıyl birge turyp jatqanymyzǵa 3 jyl bolady. Pogon taǵyp júrgenime 20 jyl boldy. Jumysym aýyr bolsa da, balalardy qamqorlyqtan kende qaldyrǵan joqpyn dep oılaımyn.

Eseıgen saıyn qoldaý kórsetip, tiregime aınalyp keledi. Tún ortasynda jumysqa shaqyra qalsa, birge baratyn boldy.

- Óz balalaryńyz buǵan qalaı qarady?

- Shynymdy aıtsam, basynda ýaıymdadym. Minezderi sáıkespese ne bolady degen oı boldy. Toǵyz balanyń tárbıesine jaýapty bolý ońaı emes ekenin bildim óıtkeni. Olardy ashyqtyrmaı, kıem degen kıimin alyp berý de ońaı emes edi.

Basynda áriptesterime ol týraly aıtpaǵan bolatynmyn. Keıin bári ashylǵan soń olar da kómek qolyn sozdy. Basshylar qoldaý bildirdi. Ásirese pandemııa kezinde 9 balanyń qajetin taýyp berý qıyn boldy.

Qashyqtan oqýdyń mashaqatyn bir adamdaı sezingen shyǵarmyz. Demeýshiler tabylyp, bizge kompıýter men prınter syılady. Balalardyń kóp bolǵany úı sharýasynda jaqsy.

Kez kelgen jumysty bólip alyp ońaılatyp jiberedi. Toǵyzdyń tórteýi – eresek. Úlkenderi kishikenelerin jetelep, selbesip ómir súrip jatyrmyz. Biri tamaq istese, bir úı jınaıdy.

Taǵy bireýi kishkentaılardyń sabaǵyn pysyqtaıdy. Eshqaısysy bos otyrmaıdy.

Perzent súıýdi armandap júrgen juptarǵa balanyń bóteni bolmaıtynyn aıtqym keledi. Bireýdiń balasy dep qaramaı, qoryqpaı bala asyrap alýǵa bolady.

Meniń ornymda bolsa, sol kezde kez kelgen basqa ana dál osyndaı sheshim qabyldaıtyn edi dep oılaımyn. Meniń mysalym bala asyrap alýǵa nıeti bar, biraq qorqynyshyn jeńe almaı júrgen adamdardy osyndaı qadam jasaýǵa ıtermeleıdi dep úmittenemin.

Qoryqpańyzdar! Múmkin bala asyrap alǵannan keıin qudaı perzent syılaıtyn shyǵar. Balanyń bárin perzentim dep qabyldaıtyn adamdar kóp bolsa, elimizde jetimder úıi de qalmaıtyn edi.

- Áńgimeńizge rahmet!


Joǵary qaraı