Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Táýelsizdik alǵaly aýyl sharýashylyǵy salasy qandaı jetistikterge jetti

2021 jyldyń 8 jeltoqsan 2021 13:11

NUR-SULTAN. QazAqparat – Elimiz Táýelsizdik alǵaly 30 jyldyń ishinde aýyl sharýashylyǵy qandaı jetistikterge jetti? Jáne búginde atalǵan sala qalaı damyp jatyr? Osy máselege qatysty «Aýyl» partııasynyń tóraǵasy, QR Parlamenti Senatynyń depýtaty Álı Bektaev pikir bildirdi, dep habarlaıdy QazAqparat tilshisi.

«Táýelsizdik alǵaly elimiz aıtýly jetistikterge jetti. Onyń ishinde aýyl sharýashylyǵy da bar. Osy oraıda búgin 30 jyl ishinde elimizdiń aýyl sharýashylyǵy salasynda jetken jetistikterdi bir saralaǵymyz kelip otyr. Ózderińiz bilesizder, aýyl sharýashylyǵy synǵa kóp ushyraıtyn salanyń biri. Sebebi onyń damýy adamı faktordan bólek, klımattyq jaǵdaımen de baılanysty. Tez sheshim qabyldaý men jyldam áreket etýdi talap etetin sala. Óıtkeni, keıbir aýyl sharýashylyq ónimderi uzaq ýaqyt kútpeı, buzylyp nemese mańyzyn tez joǵaltady. Ol ónimderdi naryqqa shyǵarýdyń da ózindik qıyndyqtary bar. Degenmen sondaı qıyn kedergilerge qaramastan búginde Qazaqstannyń aýyl sharýashylyǵy tıisti deńgeıde damyp jatyr jáne aýyz toltyryp aıtatyn jetistikter jetkilikti», - dedi Álı Bektaev.

Sondaı-aq, partııa basshysy Táýelsizdik alǵaly 30 jyldyń ishinde aýyl sharýashylyǵyndaǵy basty jetistikterdi atap berdi.

«Aldymen agroónerkásip jáne agrokeshen boıynsha zańnamany qalyptastyrdyq. Búginde zań jaǵynan kinárat joq, halyqaralyq talaptarǵa tolyq sáıkes keledi. Al ol onyń tıisti deńgeıde oryndalýy bólek másele. Ekinshi iri jetistik, mal sharýashylyǵyna qatysty. Atap aıtqanda, otandyq mal tuqymyn tazaladyq. Bizdegi iri, usaq bolsyn maldyń tuqymy taza. Sondyqtan da alys-jaqyn shetelden Qazaqstannyń malyna degen suranys joǵary. Aýyl sharýashylyǵy salasyndaǵy úshinshi jetistik, 2003-2005 jyldary QR Tuńǵysh Prezıdenti, Elbasy Nursultan Nazarbaevtyń bastamasymen elimizde «Aýyl jyly» atalyp ótildi. 3 jyldyq aýyldy damytý memlekettik baǵdarlamasynyń negizinde kóptegen aýylǵa aıtarlyqtaı jan bitti. Onyń ishinde ınfraqurylym, jumys, turǵyn úı, mektep, aýrýhana jáne aýyl áleýeti damı tústi», - deıdi ol.

Senat depýtatynyń aıtýynsha, aýyl men aýyl sharýashylyǵyn damytý baǵytyndaǵy jumys jalǵasyn tabady.

«Búginde «Aýyl - el besigi» jobasy iske asyp jatyr. Odan bólek, aýyl sharýashylyǵyn ilgeriletýge arnalǵan ulttyq joba bar», - dedi Á. Bektaev.

Aıta ketsek, búgin elordada «Táýelsizdik jáne Qazaqstannyń agroónerkásip kesheniniń damýy» taqyrybynda konferentsııa ótip jatyr.

Respýblıkalyq konferentsııa Táýelsizdiginiń 30 jyldyǵyna arnalyp, «30 ıgi is» aktsııasynyń aıasynda uıymdastyrylyp otyr. Jáne oǵan Senat depýtattary, quzyrly memleketik organ ókilderi men aýyl sharýashylyǵy salasy mamandary qatysyp jatyr.

Atalǵan shara «Aýyl» partııasynyń uıytqy bolýymen uıymdastyryldy.


Joǵary qaraı