Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Táýelsizdiktiń 30 jyldyǵy: Nur-Sultan qalasynyń basty jetistikteri qandaı

2021 jyldyń 17 qyrkúıek 2021 19:05

NUR-SULTAN. QazAqparat - Nur-Sultan qalasy ákimdiginiń uıymdastyrýymen el Táýelsizdiginiń 30 jyldyǵy aıasynda «Táýelsiz Qazaqstan: jasampazdyqqa toly jyldar. Nur-Sultan qalasynyń basty jetistikteri» taqyrybynda dóńgelek ústel ótti, dep habarlaıdy elorda ákimdiginiń resmı saıty.

Nur-Sultan qalasy ákiminiń orynbasary Ashat Oralovtyń tóraǵalyǵymen ótken dóńgelek ústelge Qazaqstan Respýblıkasynyń Memlekettik Eltańba avtory Jandarbek Málibekov, L.N.Gýmılev atyndaǵy Eýrazııa ulttyq ýnıversıtetiniń professory, fılologııa ǵylymdarynyń doktory, alashtanýshy Dıhan Qamzabekuly, fılologııa ǵylymdarynyń doktory Serik Negımov jáne ózge de zııaly qaýym ókilderi, tarıhshylar, ǵalymdar, saıasattanýshylar, qoǵam qaıratkerleri, úkimettik emes uıymdar, jastar qatysty.

Jıyndy júrgizgen Nur-Sultan qalasy ákiminiń orynbasary Ashat Oralov sóz basynda el astanasyn Saryarqa tórine kóshirý Tuńǵysh Prezıdent – Elbasy Nursultan Nazarbaevtyń úlken strategııalyq sheshimi ekenin aıryqsha atap ótti.




«Qasterli Táýelsizdigimizdiń 30 jylyndaǵy ótken árbir on jyldyq atqarǵan mıssııasy turǵysynan ǵasyrdyń júgin arqalap tur. Alǵashqy on jyldyq egemen Qazaqstannyń óz derbestigin qalyptastyrý kezeńi boldy. Ekinshi on jyldyqta elimiz tuǵyryn nyqtap, keregesin keńeıtip, irgesin bekitti. Úshinshi on jyldyqta memleketimiz shyn máninde kemeline kelip, álemdik saıasattyń tórine ozdy. Onyń árqaısysynda, árbir jetistigimizde Elbasy Nursultan Ábishuly Nazarbaevtyń qoltańbasy jatyr.

Óz kezeginde Memleket basshysy atalǵan Joldaýda «Egemendik degenimiz – jalań uran men jalyndy sóz emes. Biz úshin eń mańyzdysy – ár azamattyń Táýelsizdik ıgiligin sezine alýy. Onyń basty kórinisi – eldegi beıbit ómir, qoǵamdaǵy turaqtylyq pen tynyshtyq. Sondaı-aq, halyqtyń turmys sapasynyń jaqsarýy jáne jastardyń bolashaqqa nyq senimmen qaraýy» dep erekshe atap kórsetti», - dedi ákim orynbasary.

Nur-Sultan – saıası oqıǵalardyń ǵana emes bilim-ǵylym men mádenıettiń ordasyna aınalyp otyr. Búginge deıin kóz ilespes jyldamdyqpen damyp, elimizdiń eńseli elordasyna aınaldy.

«Táýelsizdigimizdiń 30 jyldyǵy aıaqtalyp, jańa 30 jylǵa qadam basqaly otyrmyz. Elbasymyz da, Prezıdentimiz de óz Joldaýlarynda aldymen el birligin, tynyshtyǵyn, áleýmettik jaǵdaıyn, elordamyzdyń damýyn birinshi kezekte qozǵaıdy. Tuńǵysh Prezıdentimiz Eltańbamyzdy qabyldar tusta elimizdiń, elordamyzdyń damıtyn óz joly bar ekenin aıtyp ótken. Osy 30 jylda shynymen óz jolymyzben damyp, dúnı júzine tanymal bolyp kelemiz», – dedi Jandarbek Málibek.




Táýelsizdiktiń 30 jyl ishinde Qazaqstan kóptegen qıyndyqtardy, syndarly sátterdi eńserip, álemge tanylǵan mereıli memleketke aınaldy. Al Nur-Sultan qalasy álemge tanylǵan memlekettiń sımvolyna aınalyp otyr.

«Elbasy el astanasyn Aqmola jerine kóshirgendegi aıtqan oıy da, ıdeıasy da batys pen shyǵystyń ortasynda berekeli el paıda bolýy kerek degenge negizdelgen. Ol berekeli el – jańǵyrǵan Qazaqstan degen edi Elbasy. Bul elimizge bilim-ǵylymnyń kelýine, jańa kózqarastaǵy bilimdi jastarymyzdyń ósip-ónýine áser etti.
Nur-Sultan qalasynda ótken halyqaralyq sharalardyń bári osy ıdeıanyń, ustanymnyń arqasynda bolyp jatyr», – dedi Dıhan Qamzabekuly.




Ǵalym sózin jalǵaı otyryp, rýhanı jańǵyrý aıasynda atqarylǵan sharýalardyń, olardyń bas qalanyń damýy jolyndaǵy artyqshylyqtaryna keńinen toqtalyp ótti.

«Táýelsizdiktiń 30 jyldaǵy jasampaz egemendiktiń basty sımvoly týraly oılasaq elimizdiń bas qalasy – Nur-Sultan qalasy oıymyzǵa oralady. Ol zańdy da. Sebebi halyqaralyq sarapshylardyń ózi sonaý egemendiktiń alǵashqy jyldary órkenıetti ózgerýdiń jańa syndary, qaýip-qaterleri turǵanda, jańa memleket qurylyp jatqan kezde Elbasynyń bastaýymen elordamyzdyń Almatydan Arqa tórine qonys aýdarýyn úlken modernızatsııalyq joba retinde baǵalaıdy. Ótken ǵasyrdyń sońy men osy ǵasyrǵa qarasaq jańa astana salyp, úlken ekonomıkalyq, geosaıası ózgeris jasaǵan memeleketter joqtyń qasy. Jańa memleket, jańa júıe qurý kezinde Tuńǵysh Prezıdent – Elbasy Nursultan Ábishuly Nazarbaev 32 krıterııge jaýap beretin jańa astanany qurý týraly usynys bildirdi. Mine 30 jyldan keıin sol ózgeristiń jeńisti, jemisti bolǵanyn kórip otyrmyz», – dedi «Habar» Agenttigi» aktsıonerlik qoǵamynyń Basqarma tóraǵasynyń birinshi orynbasary Rınat Kertaev.




«Búginge deıin úlken jetistikterge jettik. Elordamyz álemge tanyldy. Qazir qaıda barsaq ta elordamyzben maqtanamyz. Nur-Sultan – bilim, beıbit, ınnovatsııa ordasyna aınalyp otyr. Onyń bári birligimizdiń arqasy dep senimmen aıta alamyn. Birligimizdiń negizi – Elbasymyzdyń júzege asyrǵan saıasaty. Osy saıasattyń nátıjesinde qanshama ult, ulys birlesip, bir shańyraq astynda tatý-tátti ómir súrip keledi. Tuńǵysh Prezıdentimizge qashanda alǵysymyz sheksiz», – dedi Qazaqstan halqy assambleıasy ózbek mádenı ortalyǵynyń tóraǵasy Sherzod Pýlatov.




Jıyn sońynda qatysýshylar elordanyń búgingi tańdaǵy damýyn talqylap, elimizdiń Táýelsizdik jyldaryndaǵy kóptegen jetistikteri Nur-Sultan qalasymen baılanysty ekenin atap ótti.

Aıta keteıik, alqaly jıyn sanıtarlyq talaptardy tolyqtaı saqtaı otyryp ótti.











Joǵary qaraı