Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

TMD-da vaktsınatsııa pasportyn ózara tanýdy jedeldetýdi usynamyn - QR Prezıdenti

2021 jyldyń 15 qazan 2021 16:11

NUR-SULTAN. QazAqparat – Táýelsiz Memleketter Dostastyǵy keńistiginde vaktsınatsııa pasportyn ózara tanýdy jedeldetý kerek. Bul týraly TMD uıymyna múshe memleketter basshylary keńesiniń kezekti otyrysynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Pandemııanyń teris saldaryn eńserý kúntártibimizdegi barynsha ózekti taqyryptardyń biri. TMD memleketteri qıyn kezeńde bir-birine qajetti qoldaý men kómek kórsetý arqyly birlik pen yntymaqtastyq tanytty. Bul rette Reseı barynsha mańyzdy ról atqardy. Elderimiz koronavırýs pandemııasymen kúreste jaqsy tájirıbe jınady. Onyń ishinde vaktsına ázirleý salasy da bar. Halyqty jappaı ımmýndaý ǵana ahýaldy túzetýge jáne azamattarymyzdyń qaýipsizdigin qamtamasz etýge múmkindik bereri aıqyn. Ózderińiz de biletindeı, qazaqstandyq QazVac ázirlemese joǵary tıimdiligin kórsetip otyr jáne ózge elderge gýmanıtarlyq kómek retinde jetkizilip jatyr», - dedi Qasym-Jomart Toqaev.

QR Prezıdenti elimizdiń ǵalymdary ázirlegen jańa QazCoVac-P preparaty da klınıkalyq synaqtardan sátti ótkizilip jatqanyn aıtty. Munan bólek, taǵy úsh vaktsınany otandyq ǵalymdar klınıkaǵa deıingi testileýden ótkizý ústinde.

«Halyqaralyq deńgeıde laıyqty senimge ıe bolǵan reseılik Spýtnık V vaktsınasyn shyǵarýdy jalǵastyryp jatyrmyz. Sizderdiń elderińiz de bul salada belsendi jumys júrgizip jatqanyn bilemin. Qazaqstan tyǵyz yntymaqastyqqa, tájirıbe almasýǵa jáne óz vaktsınasyn jetkizýge daıyn. Sonymen qatar TMD keńistiginde vaktsınatsııa pasportyn ózara tanýdy jedeldetýdi usynamyn. Mundaı sheshim qabyldaý arqyly azamattardyń erkin júris-turysyn qamtamasyz etemiz jáne iskerlik baılanystardy jandandyramyz», - dedi Memleket basshysy.


Joǵary qaraı