Aýa raıy
Astana -8 °S
Almaty 13 °S
valıýta baǵamy
USD 389.98
EUR 434.01
RUB 6.10
CNY 55.04

Túrki keńesi taǵy bir elmen tolyqty: QR SІM málimdeme jasady

2019 jyldyń 16 qyrkúıek 2019 08:25

NUR-SULTAN. QazAqparat - Qazaqstan Respýblıkasy Ózbekstan Respýblıkasynyń Túrkitildes memleketterdiń yntymaqtastyq keńesine (Túrki keńesi, TMYK) kirýin qoldaıdy. Bul jóninde QR Syrtqy ister mınıstrliginiń málimdemesinde aıtylǵan, dep habarlaıdy QazAqparat.

«2019 jylǵy 14 qyrkúıekte Ózbekstan Prezıdenti Sh.Mırzıeev Túrkitildes memleketterdiń yntymaqtastyq keńesin qurý týraly Nahchyvan kelisimine qosylý týraly Jarlyqqa qol qoıdy. Sol kúni Ózbekstan Syrtqy ister mınıstrligi TMYK Hatshylyǵyna Ózbekstannyń Túrki keńesine qosylýy týraly qujatty jiberdi...

Túrki álemi úshin bul mańyzdy tarıhı sheshim Nahchyvan kelisiminiń 10 jyldyǵyn atap ótýmen dál keledi. Ózbekstannyń Túrki keńesine músheligi týraly sheshimge uıymǵa múshe memleketterdiń basshylary 2019 jylǵy 15 qazanda Bakýde ótetin shaǵyn jáne orta bıznesti damytý máselelerine arnalǵan Túrki keńesiniń 7-shi sammıti barysynda qol qoıady», - delingen málimdemede.

Aıta keteıik, Túrki keńesi QR Tuńǵysh Prezıdenti – Elbasy N.Á.Nazarbaevtyń bastamasymen 2009 jyldyń 3 qazanynda quryldy. Quryltaıshy memleketter – Qazaqstan, Ázerbaıjan, Qyrǵyzstan jáne Túrkııa.

«Ózbekstannyń TMYK-ke músheligi túrki áleminiń ıntegratsııasyn nyǵaıtýǵa jáne memleketterdiń yntymaqtastyǵyn jańa belesterge shyǵýyna yqpal etedi. Ásirese bul Túrki keńesi túrki elderiniń ekonomıkalyq ózara is-qımylyn kúsheıtý jóninde naqty qadamdar jasaǵan kezeńde oryn alýda. 2019 jyldyń mamyrynda Qazaqstannyń elordasynda ótken XII Astana ekonomıkalyq forýmy aıasynda kásipkerlerdiń arasynda ózara baılanysty kúsheıtetin jáne memleketter arasynda saýda aınalymynyń ósýine baǵyttalǵan Túrkitildes memleketterdiń birlesken saýda-ónerkásip palatasy quryldy», - dep atap ótilgen SІM málimdemesinde.


Joǵary qaraı