Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Túrkistan oblysynda batyr analar áýleti turady

2021 jyldyń 18 qyrkúıek 2021 09:54

TÚRKІSTAN. QazAqparat -Túrkistan oblysynda enesi de, kelini de, qyzdary da kópbalaly otbasy turady. Jetisaı aýdanyna qarasty Jylysý aýylyndaǵy Súttibaevtar otbasyn aýyl jurty kópke úlgili januıa retinde jaqsy tanıdy, dep habarlaıdy QazAqparat tilshisi.

Bıyl 80-ge kelgen otanasy Záýre áje 13 qursaq kóterip, 11 balany tárbıelep jetkizgen.

Batyr ananyń qyzdary men kelinderi qart ananyń jolyn qýǵan. Sondyqtan bul otbasy aýyl ishinde erekshe qurmetke bólengen.

Shańyraqtyń uıytqysy bolǵan Záýre áje bul áýletke 15 jasynda kelin bolyp túskenin aıtady.

Alaıda otaǵasy úıdiń jalǵyz balasy bolǵandyqtan, perzentteriniń kóp bolǵanyn armandaǵan.

Jas kezinde ata-enesine de qarap, eriniń de jaǵdaıyn jasap, bala-shaǵasyn da baǵyp, bárine úlgerýge tyrysqan. Ózi ata-anasyz jetim óskendikten jastaıynan beınetti de kóp kórgen.

Balalarynyń keıbirin úıde bosansa, bireýin at arbanyń ústinde, qalǵandaryn perzenthanaǵa jumystan jaıaý baryp bosanǵan eken.

«Kishkentaıymnan kelip qara jumys istedim. Jaıaý kelip egiz de týdym, jalqy da týdym. Qudaıdyń bergen 13 balasyn týdym, sonyń 11 bar. Áýeli Alla, odan keıin ata-enemniń arqasynda jettim bárine. Qyzym deýshi edi meni. Bir balam ekeý boldy dep, mynaý bala ómirge kelgen jylap ta aldy. Men ár bosanǵan saıyn qýanatyn. Sóıtim júrip ósip-óndik»,- deıdi batyr ana.

«Alma aǵashynan alysqa túspeıdi» demekshi, bul áýlettiń qyzdary men kelinderi de qarııanyń jolyn jalǵap, kópbalaly otbasyna aınalǵan.

Záýre áje qazir bes qyz, alty balasynan 75 nemere men 26 shóbere, 6 shópshek súıip otyr. Qolyndaǵy kishi kelini Saparkúl de kópbalaly ana atanǵan.

«Bul áýletke altynshy kelin bolyp tústim. Aldymda 6 abysynym, bes qaıynaǵam bar. Sol kisilerdiń jolymen, eń aldymen enemniń tárbıesin alyp kelemin. Úıretkenderin ómirimde paıdalanyp, qoldanyp kelemin. Enemniń aqyly - úlken mektep. Toı-tomalaq bolsa, bir toıdyń qyzmetin ózimiz-aq atqaryp tastaımyz»,- deıdi Saparkúl Shorabekova.

Aıta keteıik, Jetisaı aýdanynda Súttibaevtar áýleti sııaqty 16 myńǵa jýyq kópbalaly otbasy turady.

Onyń ishinde 18 jasqa deıingi balasy bar analardyń sany - 8 myńǵa jýyq.

Budan bólek, 369 batyr ana, 1700-ge jýyq altyn, 5 myńnan asa kúmis alqa ıegerleri bar. Al, 749 ana 1,2 dárejeli Ana Dańqy ordenderimen marapattalǵan.


Joǵary qaraı