Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Túrkistan oblysynda Halyqaralyq qarttar kúni qarsańynda saltanatty shara ótti

2021 jyldyń 30 qyrkúıek 2021 07:40

TÚRKІSTAN. QazAqparat - Túrkistan oblysynda Halyqaralyq qarttar kúni qarsańynda saltanatty shara ótti. Oblys ákimi Ómirzaq Shókeev «FARAB» kitaphanasynda qarııalarmen kezdesip, olarǵa qurmet kórsetti, dep habarlaıdy QazAqparat tilshisi.

Óńirdegi el aǵalary men qazynaly qarttardy biregeı kitaphanamen tanystyrǵan oblys basshysy Túrkistandy kúlli túrki áleminiń rýhanı astanasy retinde qaıta túletken Elbasynyń eńbegin erekshe atady. Fınlıandııa kitaphanalary úlgisinde salynǵan «FARAB» kitaphanasy zamanaýı qurylǵylarmen jáne ozyq tehnologııamen jabdyqtalǵan. Kópfýnktsııaly bilim berý keshenin aralatqan Ómirzaq Estaıuly kóne jazbalar taqtaıshasy men 480 myń kitapqa arnalǵan kitap saqtaý orny, tsıfrlandyrý, konservatsııalaý jáne restavratsııalaý zerthanasy, dáris zaly, kórme atrıýmy, FabLab tsıfrly sheberhanasy men sırek kitaptar men manýskrıpter zalymen tanystyrdy.

«Biz atanyń aq batasymen, ájelerimizdiń meıirimimen ósip-óngen halyqpyz. Sizderdiń ómir joldaryńyz, aqyl-keńesterińiz – biz úshin ónege. Qasıetti Túrkistandy damytýǵa sizderdiń de qosar úlesterińiz mol. Sizder bizdiń qazynamyz ári baǵyt-baǵdar beretin danalyqtyń sarqylmas bulaǵysyzdar. Sizderge, otbasylaryńyz ben jaqyn týystaryńyzǵa zor densaýlyq, berekeli uzaq ǵumyr tileımin, sanaly urpaq pen jany jomart jandardyń yqylas-nıetine bólenip árqashan aramyzda bolyńyzdar», — dedi Ómirzaq Shókeev.




Jas urpaqqa óziniń ónegeli eńbek jolymen úlgi bolyp júrgen ardagerler men tyl eńbekkerleri, oblysqa eńbegi sińgen birqatar eńbek ardagerleri men zııaly qaýym ókilderi oblys ákiminiń, oblystyq máslıhattyń jáne oblystyq ardagerler keńesiniń alǵys hattarymen marapattaldy. Respýblıkalyq ortalyq keńestiń «Qurmet belgisi» tósbelgisimen jáne Túrkistan oblystyq ardagerler keńesiniń «El aǵasy» jáne «Aıaly áje» nomınatsııalary tabystaldy.




Sondaı-aq saltanatty sharaǵa qatysqan 60-qa jýyq qarııa etnoaýylda uıymdastyrylǵan qolónershiler kórmesin tamashalady. Qazynaly qarttardyń qurmetine aq dastarhan jaıylyp, ónerpazdar án men kúıden shashý shashty. Sonymen birge kıeli Túrkistan shaharyn aralap, óńirde boı kótergen jańa nysandarmen tanysty.




Aıta keteıik, oblys aýmaǵynda 176 myńǵa jýyq zeınetker turady. Olardyń ishinde 26-y Uly Otan soǵysynyń ardageri, 2667 Ekinshi dúnıejúzilik soǵysqa qatysýshylar men múgedekterine teńestirilgender, 6336 myń tyl eńbekkeri bar. Búgingi tańda aı saıyn 1 aılyq eseptik kórsetkish mólsherinde 400-ge jýyq 80 jastan asqan jalǵyzilikti qarııalardyń zeınetaqylaryna ústemeaqy tólenedi.





Avtor Aınur Aqbaeva
Basty sózder: Aımaq, Túrkistan oblysy,
Joǵary qaraı