Aýa raıy
Astana -26 °S
Almaty 0 °S
valıýta baǵamy
USD 421.58
EUR 496.83
RUB 5.53
CNY 62.20

Túrkistanda qos ǵulamaǵa eskertkish qoıyldy

2020 jyldyń 23 qazan 2020 23:50

TÚRKІSTAN. QazAqparat – Túrkistan qalasynda qazaqtyń uly aqyny Abaıdyń 175 jyldyǵy men uly oıshyl Ábý Nasyr ál-Farabıdiń 1150 jyldyq mereıtoıyna oraı eńseli eskertkishter ornatyldy. Saltanatty rásimge QR Memlekettik hatshysy Qyrymbek Kósherbaev, QR Premer-mınıstriniń orynbasary Eraly Toǵjanov pen Túrkistan oblysynyń ákimi Ómirzaq Shókeev qatysty, dep habarlaıdy QazAqparat tilshisi.

Abaı Qunanbaıulynyń tas músini shahardaǵy «Oqýshylar saraıy» ǵımaratynyń aldyna qoıyldy. Al, álemniń ekinshi ustazy atanǵan Ábý Nasyr ál-Farabıdiń eskertkishi jańa oblystyq drama teatry aldynan boı kóterdi.

Demeýshiler esebinen jasalǵan eki eskertkishtiń de avtory – músinshi Gúlfııa Meldesh. Ultymyzdyń uly tulǵalarynyń músinderi monýmentaldy stılde jasalǵan. Qoladan quıylǵan qos eskertkishtiń bıiktigi - 4 metr, salmaǵy - 1,5 tonna. 3,5 metrlik tuǵyrǵa ornatylǵan.

Eskertkishterdiń saltanatty ashylý rásiminde sóz alǵan Memlekettik hatshy Qyrymbek Kósherbaev qasıetti qaladaǵy is-sharany uly dalanyń ulaǵatty tulǵalaryna taǵzym etý maqsatynda atqarylyp jatqan ıgi iske balady.




«Elbasy Nursultan Nazarbaevtyń bastamasymen, Memleket basshysy Qasym - Jomart Toqaevtyń qoldaýymen Túrkistan derbes oblys retinde órkendep, tarıhı shahar jasaryp, jańarýda. Túrkistan bar qazaqtyń basyn qosyp, el bolyp bátýa jasaǵan tarıhı alqap. Osy eki rýhanı tulǵaǵa arnalǵan eskertkishterdiń rýhanı astanamyz Túrkistanda turýy árıne zańdylyq, árıne qajettilik. Óıtkeni bul eskertkishter - jańa táýelsizdik zamanynda bizdiń rýhanı jańǵyrýymyzǵa qoldaýshy ári kýáger bolady degen úmitten shyqqan nıet, shara», – dedi Memlekettik hatshy.




Al oblys ákimi Ómirzaq Shókeev órkenıet kóshindegi áıgili oıshyldardyń mereıtoıy qatar kelgen bıylǵy jyldyń elimiz úshin eleýli jylǵa aınalýyn atap ótti.




«Biz bul toılardy Memleket basshysy aıtqandaı, ysyrapshyldyqpen emes, ynsap pen tálim-tárbıeniń tóńireginde atap ótýdemiz. Bul – durys sheshim. Bıylǵy jyldyń aýyr bolǵanyna qaramastan biz ult rýhanııatyna bereri mol, rýhanı-mádenı baǵyttaǵy birshama jumystar atqardyq. Eleýli eńbektiń biri – búgingi tuǵyrǵa qonǵan babalarymyzdyń beınesi. Abaı men Ábý Nasyr ál-Farabı eskertkishteri jańarǵan Túrkistannyń ómirsheń kelbetin qalyptastyrýǵa oń yńpalyn tıgizedi, dep senemin», – dedi Ómirzaq Shókeev.




Aıta keteıik, Memlekettik hatshy Qyrymbek Kósherbaev bastaǵan arnaıy delegatsııa sondaı-aq, Otyrar aýdanyndaǵy qaıta jóndeýden ótken Ál-Farabı estertkishi men «Dańqty babalar saıajoly» alleıasynda boldy.











































Joǵary qaraı